Əkin sahələrində kimyəvi mübarizə tədbirlərinin aparılması üçün dərman preparatları təqdim edilib

Naxçıvan Muxtar Respublikası Kənd Təsərrüfatı Nazirliyinin Fitosanitar nəzarəti, bitkilərin mühafizəsi və karantini şöbəsinin əməkdaşları Azərbaycan Respublikası Kənd Təsərrüfatı Nazirliyi yanında Aqrar Xidmətlər Agentliyi tərəfindən verilmiş pestisidləri əkin sahələrində karantin mənşəli zərərvericilər, alaq otları, siçan və siçanabənzər gəmiricilərlə kimyəvi mübarizə tədbirlərinin aparılması üçün Ordubad və Culfa rayonlarında rayon icra hakimiyyətlərinin əməkdaşlarına təhvil veriblər. Həmçinin torpaq mülkiyyətçiləri ilə  “Əkin sahələrində alaq otlarına və zərərvericilərə qarşı kimyəvi mübarizə tədbirlərinin aparılmasının əhəmiyyəti” mövzusunda maarifləndirici tədbirlər keçirilib.

Tədbirlərdə nazirliyin əməkdaşları Bəhruz Qasımov və Yaşar Quliyev mövzu ətrafında çıxış edərək vurğulayıblar ki, məhsuldarlığın artırılması zərərli orqanizmlərə qarşı kompleks tədbirlərin aparılmasından çox asılıdır. Kənd təsərrüfatı bitkilərinin xəstəlik və zərərvericilərindən, alaq otlarından qorunması üçün aqrotexniki, fiziki-mexaniki, bioloji, kimyəvi və karantin tədbirlərinin ardıcıl və məqsədyönlü  aparılması  vacibdir. Karantin mənşəli zərərvericilərə və alaq otlarına, karantin tətbiq edilən zərərli orqanizmlər siyahısına daxil edilməyən, lakin muxtar respublikada xüsusi təhlükəli zərərvericilər sayılan siçanabənzər gəmiricilər, mərakeş çəyirtkəsi, taxıl böcəyi və.s zərərli orqanizmlərə qarşı mübarizə tədbirlərinin səmərəli təşkil olunması  vacib məsələlərdəndir.

Sonda iştirakçılara pestisidlərin norma və nisbətlərə uyğun istifadə edilməsi, təhlükəsizlik qaydalarına ciddi əməl olunması ətraflı izah edilib və onları maraqlandıran suallar cavablandırılıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti