Heyvandarlıq

Naxçıvan Muxtar Respublikası Nazirlər Kabinetinin 15 yanvar  2020-ci il tarixli 7 saylı və 30 dekabr 2021-ci il tarixli 273 saylı qərarlarına əsasən, Naxçıvan Muxtar Respublikasında aqrar sığorta hazırda aşağıdakı heyvandarlıq məhsullarını əhatə edir:

- 11-ci gündən 7 yaşa qədər südlük mal-qara (inəklər və camışlar);

- 11-ci gündən 3 yaşa qədər ətlik mal-qara (danalar);

- 11-ci gündən 5 yaşa qədər xırdabuynuzlu heyvanlar (qoyun və keçilər).

Aqrar sığorta heyvanları hansı risklərdən sığortalayır?

Aşağıdakı risklərin baş verməsi nəticəsində sığortalanmış heyvanın ölümü:

• "Baytarlıq sahəsində profilaktikası, diaqnostikası və ləğvi dövlət büdcəsindən maliyyələşdirilən heyvanların xüsusi təhlükəli xəstəliklərinin siyahısına"na və "Bir sıra karantin və xüsusi təhlükəli yoluxucu xəstəliklər baş verdikdə, həmin xəstəliklərin ləğv edilməsi zamanı hüquqi və fiziki şəxslərə dəymiş maddi ziyanın əvəzinin ödənilməsi Qaydaları"nda göstərilmiş karantin və xüsusi təhlükəli yoluxucu (ekzotik) xəstəliklərin siyahısına daxil olan xəstəliklər istisna olmaqla, digər yoluxucu heyvan xəstəlikləri nəticəsində ölüm;
• ilan və ya həşərat sancması;
• zəhərli otlar və ya yemlərdən zəhərlənmə;
• kimyəvi maddələrin təsirindən zəhərlənmə;
•  kütləvi zəhərlənmələr nəticəsində ölüm;
• yanğın;
• vəhşi heyvanların hücumu və xüsusi təhlükəli ziyanvericilərin yayılması və hücumu;
• təbii fəlakətlər (zəlzələ, torpaq sürüşməsi, qasırğa, fırtına və dolu);
• üçüncü şəxslərin hərəkətləri;

Sığortanın  predmeti

• heyvan qapalı yerdə saxlanılmalı və saxlandığı yer “Heyvanların saxlanması, yetişdirilməsi və istifadə olunması Qaydaları”na uyğun olmalıdır;
• heyvanın “Baytarlıq tədbirlərinin təşkili və həyata keçirilməsi Qaydaları”na uyğun olaraq qulluq və qidalanması təmin edilməli;
• Naxçıvan Muxtar Respublikasının ərazisinə gətirilən heyvanlara münasibətdə "Başqa ölkələrdən gətirilən heyvanların sağlamlığını müəyyənləşdirmək üçün onların tədric olunmuş halda saxlanılması Qaydası və müddəti" ilə müəyyən edilmiş qaydada saxlanılması təmin edildikdə;
• heyvan peyvəndlənməli və birkalanmış olmalıdır;
• Heyvan barədə məlumatlar qeyd edildikdə;

Aqrar sığorta haqqı

• sığorta haqqı birdəfəlik və ya hissələrlə ödənilə bilər;
• sığorta haqqı aşağıdakı hissələrdən ibarətdir:
  • Sığortalı tərəfindən ödənilməli olan hissə;
  • Dövlət büdcəsinin vəsaiti hesabına ödənilən hissə, yəni sığorta haqqının 50%-i;
• sığorta müqaviləsində başqa hal nəzərdə tutulmamışdırsa, sığorta haqqı birdəfəlik ödənilir.
  
  Aqrar sığorta müqaviləsində sığorta haqqının hissə-hissə ödənilməsi nəzərdə tutulduğu halda sığorta haqqının ödənilməsi qaydası həmin müqavilədə müəyyən edilir. Hər bir halda sığortalı tərəfindən ödənilməli olan sığorta haqqının ilk hissəsi həmin məbləğin ən azı 25 faizini təşkil edir. Sığorta haqqının sığortalı tərəfindən ödənilməli olan hissəsinin tam ödənilməsi nəzərdə tutulduqda - hamısı, hissə-hissə ödənilməsi nəzərdə tutulduqda isə sığorta müqaviləsində müəyyən edilmiş ilk hissəsi aqrar sığorta müqaviləsinin bağlandığı gün ödənilir;
• aqrar sığorta müqaviləsində sığorta haqqının hissə-hissə ödənilməsi nəzərdə tutulduqda sığorta müqaviləsi sığorta haqqının ilk hissəsinin ödənilməsindən sonra və ya sığorta haqqının tam ödənilməsi nəzərdə tutulduqda, onun tam ödənilməsindən sonra qüvvəyə minir.

Sığorta hadisəsi olduqda

• sığorta hadisələri barədə məlumatı hadisənin baş vermə tarixindən 24 saat ərzində vasitəçi aqrar sığortaçıya və ya idarəedici quruma, eyni zamanda qanunvericiliyə uyğun olaraq, həmin hadisə barədə məlumatlandırılmalı olan digər səlahiyyətli dövlət orqanlarına məlumat verməlidir;