Naxçıvan Muxtar Respublikası Kənd Təsərrüfatı Nazirliyinin, Dövlət Baytarlıq Xidmətinin, Dövlət Sığorta Xidməti Publik Hüquqi Şəxsinin, “Naxçıvan Arıçıları” İctimai Birliyinin əməkdaşları tərəfindən Şərur Rayon İcra Hakimiyyətinin nümayəndələri ilə birlikdə Şərur rayonunun Oğlanqala və Mahmudkənd kəndlərində arıçılıq və heyvandarlıqla məşğul olan təsərrüfat sahiblərinin iştirakı ilə müşavirə keçirilib.

Müşavirəni Şərur Rayon İcra Hakimiyyətinin nümayəndəsi Osman Cəlil açaraq rayonda  heyvandarlığın və arıçılığın inkişafı üçün lazımi şəraitin olmasından və bu sahələrin inkişafına göstərilən dövlət dəstəyindən danışıb.

Müşavirədə Kənd Təsərrüfatı Nazirliyinin şöbə müdiri Əyyub Abdullayev  “2017- 2022-ci illərdə Naxçıvan Muxtar Respublikasında arıçılığın inkişafı üzrə Dövlət Proqramı’nın icrası ilə əlaqədar həyata keçirilən tədbirlərdən danışıb. Mütəxəssis arıçılığın zoobaytar qaydaları əsasında inkişaf etdirilməsi, ilkin yaz mövsümündə arılara qulluq məsələlərini önə çəkib. Vurğulanıb ki, arıçılıq mövsümü praktik olaraq, arı ailələrinin qışlamadan çıxarılmasından sonra başlayır. Muxtar respublikada yazda arı ailələrini qışlama yerlərindən qışlama şəraitindən asılı olaraq müxtəlif vaxtlarda çıxarırlar. Əgər qışlama normal keçibsə, pətəkdə ölmüş arılar azdırsa, arılar sakitdirlərsə və ishal əlaməti yoxdursa, yem ehtiyatı və yemin keyfiyyəti arının tələbatına cavab verirsə arıxananı qışlamadan çıxarmağa tələsmək lazım deyil. Pətəklər havanın temperaturu +12°C olduqda qışlama yerlərindən çıxarılmalıdır. Bu vaxt arını çıxarmaq ona  görə yaxşıdır ki, eyni vaxtda  tozlu və ballı bitkilər çiçək açır. O hallarda ki, qışlama zəif yem ehtiyatı ilə və ya şirə balı ilə qarışıq yemlərlə başlayıb, arılar narahatdırlarsa güclü səs salırlarsa və pətəyin uçuş taxtası və ya ön divarı ilə sürünərək onu ishal ilə bulaşdırırlarsa arıxananı qışlamadan çıxarmağı gecikdirmək olmaz. Qışlamadan çıxarılmazdan əvvəl arıxana yerləşən ərazidə arıların təmizləyici uçuşu həyata keçirməsi üçün hazırlıq işləri aparmaq lazımdır.

Əyyub Abdullayev heyvandarlığın inkişafından danışaraq vurğulayıb ki, heyvandarlıqla məşğul olan ailə təsərrüfatlarında heyvanlar arasında baytarlıq tədbirlərinin vaxtında aparılması, düzgün yemləndirilməsi, heyvanların sığortalanması ilə bağlı görülən işlər heyvanların sağlamlığının təbii risklərdən qorunmasına və məhsul bolluğuna şərait yaradır. Diqqətə çatdırılıb ki, muxtar respublika iqtisadiyyatında diqqətçəkən fəaliyyət istiqamətlərindən biri də ailə təsərrüfatlarıdır. Son dövrlərdə dövlət tərəfindən bu fəaliyyət sahəsinin təşviqi ilə bağlı atılan addımlar muxtar respublikada ailə təsərrüfatlarının sayının artmasına yeni imkanlar açıb. Ailə təsərrüfatlarının yaradılması və inkişafı məşğulluq problemini həll edir, əhalinin gəlirinə müsbət təsir göstərir. Ona görə də ailə təsərrüfatlarının yaradılmasına üstünlük verilməlidir.

Dövlət Sığorta Xidməti Publik Hüquqi Şəxsinin əməkdaşı Mehdi Bağırov, Dövlət Baytarlıq Xidmətinin əməkdaşı Yavuz Hacıyev və “Naxçıvan Arıçıları” İctimai Birliyinin sədri Etibar Məmmədov  heyvandarlığın inkişafına göstərilən dövlət dəstəyi, aparılması zəruri olan baytarlıq tədbirləri və heyvanların sığortalanması haqqında iştirakçılara ətraflı məlumat veriblər.

 Sonda çıxışlar ətrafında müzakirələr aparılıb və iştirakçıları maraqlandıran suallar cavablandırılıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti