Heyvandarlıqla məşğul olan təsərrüfat sahiblərinin iştirakı ilə müşavirə keçirilib

Naxçıvan Muxtar Respublikası Kənd Təsərrüfatı Nazirliyinin mütəxəssisləri tərəfindən Şahbuz Rayon İcra Hakimiyyəti ilə birlikdə rayonun Ağbulaq kəndində heyvandarlıqla məşğul olan təsərrüfat sahiblərinin iştirakı ilə “Qaramalın cins tərkibinin yaxşılaşdırılmasının, ana malların süni mayalandırılmasının, ana qoyun və keçilərdən doğulan balalara zoobaytar qaydalarına uyğun qulluq edilməsinin və otlaqlarından səmərəli istifadə olunmasının əhəmiyyəti”, “Aqrar sığortanın və südçülüklə məşğul olan ailə təsərrüfatlarında xama, qaymaq, şor, qurut, motal pendir və digər ənənəvi süd məhsullarının istehsalının genişləndirilməsinin əhəmiyyəti” mövzularında növbəti müşavirə keçirilib.

Müşavirəni Şahbuz Rayon İcra Hakimiyyyətinin əməkdaşı Arzu Əhmədov açaraq rayonda heyvandarlığın inkişafı üçün lazımi şəraitin olmasından və heyvandarlığın inkişafına göstərilən dövlət dəstəyindən danışıb.

Kənd Təsərrüfatı Nazirliyinin şöbə müdiri Əyyub Abdullayev mal-qaranın cins tərkibinin yaxşılaşdırılmasının əhəmiyyətindən danışaraq vurğulayıb ki, muxtar respublika iqtisadiyyatında diqqətçəkən fəaliyyət istiqamətlərindən biri də qaramalın cins tərkibinin yaxşılaşdırılmasıdır. Son illərdə muxtar respublikamızda heyvanların cins tərkibinin yaxşılaşdırılması, iri heyvandarlıq təsərrüfatlarının yaradılması və xarici ölkələrdən lizinq yolu ilə güzəştli şərtlərlə damazlıq düyələrin idxal edilməsi nəticəsində süni mayalandırma işinə daha çox tələbat yarandığından kənd yerlərində bu sahəyə maraq daha da artmışdır. Ötən il muxtar respublikada Süni Mayalama Məkəzinin  yaradılması, Naxçıvan şəhərində və rayonlarda  yeni süni mayalanma məntəqələrinin sayının 23-ə çatdırılması süni mayalanma işinin daha da mütəşəkkil şəkildə aparılmasına öz töhfəsini verəcəkdir. Qeyd olunub ki, südçülüklə məşğul olan ailə təsərrüfatlarında xama, qaymaq, şor, qurut, motal pendir və digər ənənəvi süd məhsullarının istehsalının artırılmasına dövlət tərəfindən atılan addımlar muxtar respublikada məhsul bolluğuna şərait yaratmışdır. Süd məhsullarının ənənəvi istehsalının təbliğ olunması məhsul bolluğuna müsbət təsir etməklə, fermerlərin iqtisadi gəlirinin artmasına əsaslı təsir göstərir. Ona görə də bu sahələrin inkişafına üstünlük verilməlidir. Həmçinin ailə təsərrüfatlarında saxlanılan mal-qaraya zoobaytar qaydalarına uyğun qulluq edilməsi, məhsuldarlığın artırılması, süd məhsullarının hazırlanmasında gigiyenik qaydalara əməl edilməsi haqqında iştirakçılara ətraflı məlumat verilib.

Nazirliyin baş məsləhətçisi Rasim Hacıyev otlaq sahələrində yem ehtiyatlarının qorunması və bərpası tədbirlərinin önəmindən danışaraq qeyd edib ki, muxtar respublikada torpaqların münbitliyinin artırılması, heyvandarlığın yem bazasının möhkəmləndirilməsi, təbii yem sahələrinin mühafizəsi, otlaqların geobotanik zənginliyinin qorunub saxlanılması mühüm iqtisadi və ekoloji əhəmiyyət daşıyır. Ona görə də təsərrüfat sahibləri otlaqlardan və örüş sahələrindən növbəli şəkildə istifadə etməli, torpaqların eroziyaya uğramasına yol verməməlidir.

Nazirliyin aparıcı məsləhətçisi Umar Şükürlü heyvandarlıqda aqrar sığortanın tətbiqinin əhəmiyyətindən danışaraq qeyd edib ki, kənd təsərrüfatı heyvanları və akvakultura məhsulları üzrə sığorta haqqının 50 faizi dövlət büdcəsi hesabına ödəniləcək. Heyvandarlıq sahəsində məhsuldarlıq və istehsal göstəricilərinin yüksəldilməsi məqsədilə 11-ci gündən 7 yaşına qədər südlük inəklər və camışların, 11-ci gündən 3 yaşına qədər ətlik istiqamətli danalar və kəlçələrin, 11-ci gündən 5 yaşına qədər xırdabuynuzlu heyvanlar - qoyunlar və keçilərin, suda yetişdirilən məhsullar üzrə akvakulturanın inkişafını stimullaşdırmaq, balıq məhsulları ilə təminatda yerli istehsalın xüsusi çəkisini artırmaq üçün ilkin mərhələdə balıqların sığortası təmin ediləcəkdir.

Sonda müşavirə iştirakçılarını maraqlandıran suallar cavablandırılıb, mütəxəssislər tərəfindən hazırlanan  maarifləndirici bukletlər təsərrüfat sahiblərinə paylanıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti