Torpaq mülkiyyətçiləri ilə tarla seminar-müşavirəsi keçirilib

Naxçıvan Muxtar Respublikası Kənd Təsərrüfatı Nazirliyinin mütəxəssisləri tərəfindən Şərur Rayon İcra Hakimiyyəti ilə birlikdə rayonun Püsyan kəndində torpaq mülkiyyətçiləri və sahibkarların iştirakı ilə  “Yaz əkinlərinin optimal müddətdə aparılması və yağlı bitkilərin əkin sahələrinin genişləndirilməsi” mövzusunda tarla seminar- müşavirəsi keçirilib.

Müşavirəni Şərur Rayon İcra Hakimiyyətinin əməkdaşı Miryasin Seyidov  açaraq rayonda kənd təsərrüfatının inkişafından və ailə təsərrüfatlarına göstərilən dövlət dəsdəyindən danışıb.  

Kənd Təsərrüfatı Nazirliyinin şöbə müdiri Xaliq Abbasov  yaz əkinlərini  gedişi və yağ üçün qarğıdalı və günəbaxan bitkilərinin əhəmiyyətindən, əkilib becərilmə texnologiyasından danışaraq vurğulayıb ki, muxtar respulbika  əhalisinin etibarlı ərzaq təminatı iqtisadi sabitliyin və sosial dayanıqlığın başlıca şərtidir. Ona görə də cəmiyyətin hər bir üzvünün əsas ərzaq məhsullarına olan tələbatının tam ödənilməsi üçün davamlı olaraq müvafiq tədbirlərin həyata keçirilməsi çox vacibdir. Qarşıda duran ən mühüm vəzifələrdən biri də muxtar respublika əhalisini qarğıdalı və günəbaxan yağı  ilə təmin etməkdir. Şərur Sənaye Məhəlləsində bitki yağı emalı müəssisəsinin yaradılması və bu müəssisənin xammala olan tələbatının yerli istehsal hesabına ödənilməsi üçün yağlı bitkilərin əkin sahələrinin genişləndirilməsinə önəm verilməlidir. Qeyd olunub ki, qarğıdalı bitkisini  həm növbəli əkin tətbiq edilməklə, həm də bir necə il eyni sahədə əkilməklə becərmək mümkündür. Qarğıdalı bitkisi üçün ən yaxşı sələflər payızlıq taxıllar, birillik dənli-paxlalı bitkilər, kartof, şəkər çuğunduru və.s hesab olunur. Vegatasiya müddəti qısa olduğundan kövşənlik bitkisi kimi qarğıdalını payızlıq buğda və arpadan sonra əkib, eyni sahədən bir ildə iki dəfə məhsul götürmək mümkündür. Mütəxəssis günəbaxan bitkisinin becərilmə texnologiyası haqqında danışaraq qeyd edib ki, üzvi və mineral gübrələrdən, eləcədə keyfiyyətli  toxum materialından istifadə etmədən günəbaxan bitkisindən yüksək məhsul götürmək çətindir. Bunu nəzərə alaraq hektara 15-20 ton peyin, 200-300 kq superfosfat  gübrəsi verilməlidir. Günəbaxan bitkisi fosfor qidası ilə  yaxşı təmin olunduqda dənlərdə yağ faizi artır. Azot gübrəsi isə bitkinin boy atmasını sürətləndirir, iri yarpaqlar, gövdə və səbətlərin formalaşmasını təmin edir.

Nazirliyin sektor müdiri Valeh Mehdiyev qarğıdalı və günəbaxan bitkilərinin əkininin aparılmasında texnika və avadanlıqların rolu haqqında sahibkarlara ətraflı məlumat verib. Qeyd olunub ki, muxtar respublikaya “Naxçıvan Aqrolizinq” ASC-nin xətti ilə hər il bu bitkilərin əkininin aparılması üçün kifayət qədər texnika və aqreqatlar alınıb gətirilir. Həmin texnikaların lizinq yolu ilə satışı təşkil olunur ki, bu da qarğıdalı və günəbaxan bitkilərinin əkininin və aqrotexniki tədbirlərinin aparılmasında əl əməyində istifadə etmədən yüksək məhsuldarlığa nail olunmasına imkan yaradır.

Sonda təsərrüfat sahiblərini maraqlandıran suallar cavablandırılıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti