Naxçıvan Dövlət Universitetinin Baytarlıq ixtisasının tələbələri Süni Mayalanma Mərkəzində təcrübə keçiblər

   Naxçıvan Dövlət Universitetinin “Baytarlıq” ixtisasının tələbələri Naxçıvan Muxtar Respublikasının Süni Mayalanma Mərkəzində olublar.

    Naxçıvan Muxtar Respublikasının Kənd Təsərrüfatı naziri Bəhruz Bayramov diqqətə çatdırıb ki, muxtar respublikada heyvandarlığın inkişafı məqsədilə qəbul edilmiş dövlət proqramlarının uğurlu icrası və görülən digər mühüm işlər əhalinin keyfiyyətli və yerli heyvandarlıq məhsulları ilə təmin olunmasına müsbət təsir göstərir. Həyata keçirilən məqsədyönlü tədbirlərin nəticəsində aqrar sektorda dinamik inkişaf qorunub saxlanılmış və daxili bazarda məhsul bolluğu yaradılmışdır. Dövlət siyasətinin prioritet istiqamətlərindən biri olan ərzaq təhlükəsizliyi tədbirləri, ilk növbədə, cəmiyyətin sağlam həyat tərzinin qorunub saxlanılmasına, səmərəli məşğulluğun təmin olunmasına, ümumilikdə, muxtar respublikanın davamlı inkişafına yeni imkanlar yaradıb. Ərzaq təhlükəsizliyinin təmin olunmasında mühüm sahələrdən biri də heyvandarlıqdır. Muxtar respublikada yeni heyvandarlıq təsərrüfatlarının yaradılması və mal-qaranın cins tərkibinin yaxşılaşdırılması istiqamətində həyata keçirilən tədbirlər, əlverişli yem bazası, baytarlıq idarələrinin maddi-texniki bazasının gücləndirilməsi, süni mayalanma yolu ilə doğulmuş hər baş buzova görə subsidiyanın verilməsi və ixtisaslı kadrlarla təminat heyvandarlığın inkişafını sürətləndirib. Muxtar respublikada süni mayalanma işlərini günün tələbləri səviyyəsində təşkil etmək və mal-qaranın cins tərkibinin yaxşılaşdırılması məqsədilə Naxçıvan Muxtar Respublikası Ali Məclisi Sədrinin 2019-cu il 21 sentyabr tarixli Sərəncamı ilə Naxçıvan Muxtar Respublikasının Süni Mayalanma Mərkəzi yaradılıb. Mərkəz mal-qaranın cins tərkibinin yaxşılaşdırılması istiqamətində əhəmiyyətli rola malikdir.

   Naxçıvan Dövlət Universitetinin rektoru Elbrus İsayev bildirib ki, mərkəz tələbələrin təcrübi dərslərinin keçirilməsində mühüm baza rolunu oynamaqla yanaşı, ixtisaslı kadr hazırlığına da mühüm töhfə verir. Rektor qeyd edib ki, 12 may 2020-ci ildə Süni Mayalanma Mərkəzinin yaradılması ilə bağlı keçirilən tədbirdə Naxçıvan Muxtar Respublikası Ali Məclisi Sədrinin ali təhsil ocağı qarşısında qoyduğu vəzifələr icra olunub. Belə ki, görülən işlərin icrası çərçivəsində Türkiyənin Uludağ Universitetinin Baytarlıq fakültəsindən dəvət olunmuş professor, doktor Zekariya Nur mal-qaranın cins tərkibinin yaxşılaşdırılması üçün süni mayalanma tədbirlərinin əhəmiyyəti haqda danışaraq heyvanlar üzərində təcrübəni əyani sürətdə nümayiş etdirib. Həmçinin ali təhsil ocağının Qars Qafqaz Universiteti arasındakı razılaşmaya əsasən ötən il Baytarlıq fakültəsi müəllimləri Baytarlıq təbabətinin müxtəlif sahələri üzrə tələbələrə onlayn dərs keçiblər.

   Qeyd edək ki, mərkəzin inzibati binasında tələbələr üçün auditoriya quraşdırılıb. Süni mayalanma törədicilərindən toxum alınma binasında tələbələr əyani sürətdə erkək heyvanlardan toxum alınması prosesini izləyiblər. Heyvanların yemlənməsi, suvarılması, təmizlənməsi ilə bağlı işlərlə tanış olublar.

   Mərkəzin işçiləri laboratoriya ilə tanışlıq zamanı toxumun poyetlərdə dərin dondurulması, çeşidlənməsi və ekvilibrasiyası, dərin dondurulmuş dolu payetlərin qablaşdırılması və saxlanması, toxumun keyfiyyətinin yoxlanması, eyakulyatın ilkin müayinəsi və duruldulması haqqında ətraflı məlumat veriblər.

    Mərkəzin müdiri Yusif Qurbanov qeyd edib ki, damazlıq heyvanların cins tərkibinin yaxşılaşdırılmasında və sürətlə törəyib artmasında ən mütərəqqi zoobaytar tədbirlərdən biri də süni mayalama üsuludur. Muxtar respublikada 15 ilə yaxın bir dövrdə mal-qaranın cins tərkibinin yaxşılaşdırılması diqqətdə saxlanılıb, süni mayalanma tədbirləri həyata keçirilib. Vurğulanıb ki, həm elmi-tədqiqat və həm də tədris-təlim mərkəzi rolunu oynayan mərkəz muxtar respublikada heyvandarlığın inkişafında xüsusi rol oynayır. Diqqətə çatdırılıb ki, bu ixtisas üzrə təhsil alan tələbələrin əsas vəzifələrindən biri muxtar respublikanın rayon və kəndlərində heyvandarlığın inkişafı ilə bağlı həyata keçirilən Dövət Proqramları, damazlıq heyvandarlıq, sünü mayalanma texnikası və damazlıq uçotun aparılması ilə bağlı şəxsi və fermer təsərrüfatlarında maarifləndirici tədbirlərin aparılmasıdır.

   Qeyd edək ki, mərkəzdə südlük və ətlik-südlük istiqamətində “Holştein-friz”, “Simmental”, “Qafqaz camışı”, “Balbas”, “Mazex”, “Romanov”, “Hələb”, “Saanen” və yerli cins iri və xırdabuynuzlu törədicilər saxlanılır.

      Daha sonra təlim-tədris mərkəzində yeni cins buzovların alınması ilə bağlı televiziya verilişinə baxış olub.

   Sonda Naxçıvan Dövlət Universitetinin Magistratura mərkəzinin direktoru Etibar Məmmədovun “Naxçıvan Muxtar Respublikasında camışçılığın iqtisadi əhəmiyyəti və inkişaf perspektivləri” və “Kənd təsərrüfatı heyvanlarının helmintorlarının profilaktikası” adlı kitabları mərkəzə təqdim olunub.