Naxçıvan Muxtar Respublikası Kənd Təsərrüfatı Nazirliyi tərəfindən payızlıq əkinlərlə bağlı maarifləndirici görüşlərin keçirilməsi davam etdirilir

Bu dəfəki görüş Şərur rayonunun Xanlıqlar kəndində olub.

Görüşdə fermerlərə yüksək məhsul əldə etmək üçün keyfiyyətli əkin aparılmasına xüsusi diqqət yetirmək, əkin materialı kimi sertifikatlı toxumdan istifadə etmək, istehsal prosesində aqrotexniki qulluq qaydalarına tam şəkildə riayət etmək tövsiyə olunub.

Məlumat verilib ki, muxtar respublikada cari payızlıq əkin üçün istehsalçıları keyfiyyətli buğda və arpa toxumları ilə təmin etmək üçün dövlət dəstəyi hesabına toxum ehtiyatı yaradılıb. İstehsalçılar Şərur Regional Dövlət Aqrar İnkişaf Mərkəzinə müraciət edərək toxum əldə edə bilərlər.

Görüşdə müxtəlif mövzular ətrafında fikir mübadiləsi aparılıb, fermerlərin sualları ətraflı cavablandırılıb, səsləndirilən təkliflər qeydə alınıb.

Maarifləndirici görüşlərin keçirilməsi davam etdiriləcək.