Payızlıq əkinlərlə bağlı maarifləndici görüşlər keçirilir, əkin sahələrinə baxılır

“Naxçıvanda keyfiyyətli əkinlərin həyata keçirilməsi təmin edilir. Bu il ilk dəfə olaraq taxıl  istehsalçılarına dövlət hesabına toxumlar verilir. Bundan başqa istehsalçıların gübrə təminatı da diqqətdə saxlanılır. Artıq  gübrə çeşidlərinin artırılması ilə bağlı  müəyyən tədbirlərin görülməsinə başlanılıb”.

Bu fikirlər Naxçıvanda payızlıq əkinlərlə bağlı keçirilən maarifləndirici görüşlərdə səsləndirilib.

Görüşlərdə fermerlərə taxıl əkinləri üzrə  şumun vaxtında qaldırılması, əkinin keyfiyyətli toxumla həyata keçirilməsi, su ehtiyatlarından səmərəli istifadə edilməsi, o cümlədən düzgün aqrotexniki qulluq qaydalarının göstərilməsi bərədə tövsiyələr verilib. Taxılçılıqda xəstəlik və ziyanvericilərə qarşı mübarizə tədbirləri barədə  də məlumatlar fermerlərin diqqətinə çatdırılıb.

Məlumat verilib ki, cari payızlıq əkin üçün istehsalçıları keyfiyyətli buğda və arpa toxumları ilə təmin etmək üçün dövlət dəstəyi hesabına toxum ehtiyatı yaradılıb. İstehsalçılar fəaliyyət göstərdikləri regional dövlət aqrar inkişaf mərkəzlərinə müraciət edərək  toxum əldə edə bilərlər.