Muxtar respublikanın rayonlarında heyvandarlıqla məşğul olan şəxslərlə görüşlər keçirilir, heyvandarlığın intensiv inkişafında süni mayalanmanın əhəmiyyəti diqqətə çatdırılır

Şərur rayonun Danyeri, Maxta, Ələkli, Babək rayonunun Qahab, Culfa rayonunun Qazançı, Kəngərli rayonunun Xök, Şahtaxtı kəndlərində və Qıvraq qəsəbəsində heyvandarlıqla məşğul olan təsərrüfat sahiblərilə görüş olub, süni mayalanma yolu ilə doğulmuş buzovlara baxış keçirilib.

Məlumat verilib ki,  süni mayalanma üsulu ilə mal-qaranın cins tərkibi, eləcə də damazlıq işi yaxşılaşır,  heyvanların mahsuldarlıq keyfiyyəti yüksəlir, yeni cinslər yaradılır, köhnə cinslər yaxşılaşdırılır, təbii cütləşmə ilə yayılan təhlükəli xəstəliklərin (brusellyoz, vibrioz, trixomonoz, kompilo-bakterioz və s.) qarşısı alınır,  heyvanların qısırlığı ilə mübarizə aparılır.

Süni mayalanma yolu ilə alınan hər bir buzov üçün dövlət tərfindən 100 manat məbləğində subsidiya verildiyi də diqqətə çatdırılıb, Naxçıvan Muxtar Respublikası Süni Mayalanma Mərkəzinin fəaliyyəti barədə məlumat verilib. Bildirilib ki, Süni Mayalanma Mərkəzində məhsuldar cinslərin damazlıq törədiciləri saxlanılır. Mərkəz yerlərdə süni mayalanmanı həyata keçirən texnikləri sağlam toxum ilə təmin edir. Fermerlər öz təsərrüfatlarında yetişdirdikləri ana mallara bu metodu tədbiq etmək üçün bölgələrdə olan  süni mayalanma texniklərinə müraciət edə bilərlər.

Qeyd edək ki, Azərbaycan Respublikası Prezidentinin 5 iyun 2023-cü il tarixli Sərəncamı ilə təsdiq edilmiş "Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı"nın icrası ilə əlaqədar Naxçıvan MR Kənd Təsərrüfatı Nazirliyində tədbirlər planı tərtib olunub. Bu görüşlər də Tədbirlər Planına uyğun olaraq keçirilir.

 Maarifləndirici tədbirlərin keçirilməsi davam etdiriləcəkdir.