Heyvandarlığın intensiv inkişaf yolu süni mayalanmadan keçir

Azərbaycan Respublikası Prezidentinin 5 iyun 2023-cü il tarixli Sərəncamı ilə təsdiq edilmiş "Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı"nın icrası ilə əlaqədar Naxçıvan MR Kənd Təsərrüfatı Nazirliyində tədbirlər planı tərtib olunub. Tədbirlər Planına uyğun olaraq Naxçıvan MR Süni Mayalanma Mərkəzinin əməkdaşlarının iştirakı ilə muxtar resbublikanın rayonlarında heyvandarlıqla məşğul olan şəxslərlə görüşlər keçirilir,  heyvandarlıqda məhsuldarlığın artırılması üçün süni mayalanma tədbirlərinin əhəmiyyəti diqqətə çatdırılır.

Növbəti  tədbir Şərur rayonun Xanlıqlar kəndində keçirilib. Tədbirdə Naxçıvan Muxtar Respublikası Süni Mayalanma Mərkəzinin direktoru Yusif Qurbanovun və digərlərinin müxtəlif  mövzulardakı çıxışları dinlənilib.

Məlumat verilib ki, heyvanların cins tərkibinin yaxşılaşdırılması, qısırlığın aradan qaldırılması üçün dünya praktikasında ən mütərəqqi biotexnoloji üsul hesab olunan süni mayalanma tədbirləri iqtisadi cəhətdən çox əhəmiyyətli olub, damazlıq-seleksiya işlərinin əsasını təşkil edir. Bu üsulla mal-qaranın cins tərkibi, eləcə də damazlıq işi yaxşılaşır,  heyvanların mahsuldarlıq keyfiyyəti yüksəlir, yeni cinslər yaradılır, köhnə cinslər yaxşılaşdırılır, təbii cütləşmə ilə yayılan təhlükəli xəstəliklərin (brusellyoz, vibrioz, trixomonoz, kompilo-bakterioz və s.) qarşısı alınır,  heyvanların qısırlığı ilə mübarizə aparılır.

Heyvanlarda qısırlığı aradan qaldırmaq üçün süni mayalanma işindən istifadə zamanı bir sıra zoobaytar tədbirləri həyata keçirilməlidir. Belə ki, heyvanlarda qısırlığın səbəbini aydınlaşdırılmalı, hər bir təsərrüfatda süni mayalanma planı tərtib edilməli, heyvanların normal yemlənməsi təşkil edilməli, heyvanların təmizlənməsi və gəzdirilməsi nəzarət altında saxlanılmalıdır.

Diqqətə çatdırılıb ki, sahibkarlar öz təsərrüfatlarında yetişdirdikləri ana mallara süni mayalanma metodunu tədbiq etmək üçün bölgələrdə olan  süni mayalanma texniklərinə müraciət edə bilərlər.

Qeyd edək ki, muxtar respublikanın bütün rayonlarında bu cür maarifləndirici tədbirlərin keçirilməsi davam etdiriləcəkdir.