Vəli Novruzov Ordubad rayon ictimaiyyətinə təqdim edilib

Culfa Regional Dövlət Aqrar İnkişaf Mərkəzinin direktoru vəzifəsinə təyin edilən Vəli Novruzov Ordubad rayon ictimaiyyətinə təqdim edilib.

Bu münasibətlə keçirilən tədbirdə Naxçıvan Muxtar Respublikası Kənd Təsərrüfatı Nazirliyinin Aparat rəhbəri Vüsal İbrahimov cari ildə muxtar respublikada kənd təsərrüfatının inkişafı istiqamətində həyata keçirilən tədbirlər barədə məlumat verib, tədbir iştirakçılarının suallarına aydınlıq gətirib.

Regional dövlət aqrar inkişaf mərkəzləri barədə danışan aparat rəhbəri qeyd edib ki, Culfa Regional Dövlət Aqrar İnkişaf Mərkəzi Ordubad və Culfa rayonlarını əhatə edir. Mərkəzdə bitkiçiliyin və heyvandarlığın təşkili, meliorasiya və irriqasiya məsələləri, örüş və otlaqlara nəzarət və s.bu kimi məsələlər tənzimlənəcək. Bu mərkəzlər, o cümlədən aparılan struktur islahatları çərçivəsində yaradılan digər qurumlar Naxçıvanda kənd təsərrüfatının inkişaf etdirilməsi ilə yanaşı, aqrar sahədə çalışan şəxslərin işlərinin xeyli asanlaşdırılmasına xidmət edir. 

Sonra Culfa Regional Dövlət Aqrar İnkişaf Mərkəzinin direktoru vəzifəsinə təyin edilən Vəli Novruzov ictimaiyyətə təqdim edilib. Bildirilib ki, Vəli Novruzov bundan öncə Naxçıvan Muxtar Respublikası Dövlət Baytarlıq Xidmətinin rəisi vəzifəsində çalışıb.

Vəli Novruzov göstərilən etimada görə minnətdarlığını bildirib, qarşıya qoyulan vəzifələri layiqincə yerinə yetirəcəyini qeyd edib.