Fariz Şıxəliyev Babək rayonunun ictimaiyyətinə təqdim edilib

Naxçıvan Regional Dövlət Aqrar İnkişaf Mərkəzinin sektor müdiri, direktor vəzifələrini müvəqqəti icra edən Fariz Şıxəliyev Babək rayonunun ictimaiyyətinə təqdim edilib.

Bu münasibətlə keçirilən tədbirdə Naxçıvan Muxtar Respublikası Kənd Təsərrüfatı Nazirliyinin Aparat rəhbəri Vüsal İbrahimov bildirib ki,  2023-cü ilin ötən dövründə Naxçıvan Muxtar Respublikası Kənd Təsərrüfatı Nazirliyi tərəfindən aqrar sahənin mövcud vəziyyəti təhlil edilib, nəticələrə uyğun olaraq struktur və kadr islahatları aparılıb, qanunvericilik bazası təkmilləşdirilib.

Yeni yaradılan qurumlar, o cümlədən regional dövlət  aqrar inkişaf mərkəzləri barədə məlumat verən Vüsal İbrahimov qeyd edib ki, Naxçıvan Regional Dövlət Aqrar İnkişaf Mərkəzi Naxçıvan şəhəri, Babək və Şahbuz rayonlarını əhatə edir. Mərkəz nazirliklə fermerlərin, ailə təsərrüfatçılarının, aqrar sektorda fəaliyyət göstərən sahibkarların əlaqəli işini təmin edəcək. Artıq vətəndaşlar Kənd Təsərrüfatı  Nazirliyinin səlahiyyətlərinə daxil olan məsələlərlə bağlı uzun yol qət etmədən birbaşa bu mərkəzə müraciət edəcəklər. Mərkəzin əməkdaşları tərəfindən vətəndaşların müraciət və təkliflərinə yerindəcə baxılacaq və həlli istiqamətinə müvafiq iş aparılacaq.

Aparat rəhbəri uçot işlərinin aparılması üçün elektron məlumat bazasının yaradılması və “Elektron kənd təsərrüfatı” informasiya sisteminə inteqrasiya olunması, kənd təsərrüfatı texnikaları, o cümlədən istehsal vasitələri ilə təminatın yaxşılaşdırılması üçün görülən işləri də diqqətə çatdırıb, bütün bunların həm muxtar respublikada kənd təsərrüfatının inkişafına, həm də bu sahədə fəaliyyət göstərən insanların işlərinin xeyli asanlaşmasına səbəb olacağını bildirib.

Sonra Naxçıvan Regional Dövlət Aqrar İnkişaf Mərkəzinin sektor müdiri, direktor vəzifələrini müvəqqəti icra edən Fariz Şıxəliyev rayon ictimaiyyətinə təqdim edilib. Bildirilib ki, Fariz Şıxəliyev  bundan öncə Naxçıvan Muxtar Respublikası Dövlət Baytarlıq Xidmətində çalışıb.

Fariz Şıxəliyev göstərilən etimada görə minnətdarlığını bildirib, qarşıya qoyulan vəzifələr barədə məlumat verib.