Torpağın aqrokimyəvi analizlərinin fermerlərə faydası - Fermerlərə məsləhət

Torpağın aqrokimyəvi tərkibini bilmək hər bir fermer üçün vacib amildir. Bu analizin aparılması və onun əsasında torpağa edilən qulluq nəticəsində bol məhsul əldə etmək mümkündür. Aqrokimyəvi analizlərin əhəmiyyəti məhsuldar torpaqların münbitliyinin qorunub saxlanılması ilə yanaşı, həm də az məhsuldar, şərti yararsız torpaqların müəyyənləşdirilməsi və münbitliyin artırılması tədbirlərinin görülməsi üçün də zəruridir.

Fermerlər  torpaqlarını analiz etdirməklə onda olan qida maddələrinin miqdarını, torpaq mühitinin reaksiyasını (pH), duzluluğunu və s. öyrənə bilərlər. Analizin nəticələrinə əsaslanaraq əkiləcək bitkiyə müvafiq gübrələmə proqramına uyğun qida maddələri verilməlidir.

Torpağın aqrokimyəvi analizi aparmadan gübrə istifadə edilərsə aşağıdakı problemlərlə üzləşə bilərlər:

Bitkinin ehtiyacından az gübrə istifadə edildikdə tələb olunan miqdarda qida qəbul edə bilmir və buna görə də bitki inkişafdan qalır.  Eyni zamanda bitkinin ehtiyacından daha çox gübrə istifadə edilə bilər ki, bu da torpağa və bitkiyə mənfi təsir göstərir. Hər iki halda gübrə üçün xərclənən vəsait effektiv olmur və bitkinin məhsuldarlığı azalır. Düzgün olmayan vaxtda gübrənin verilməsi də baş verir. Belə olan halda torpağa verilən gübrənin də bir əhəmiyyəti qalmır. Ona görə də torpaqdan yüksək məhsul almaq və davamlı istifadəsini təmin etmək üçün torpağa lazımi miqdarda, lazımi zamanda və düzgün növ mineral gübrənin verilməsini həyata keçirməlidir.

 Əkin sahələrinə düzgün gübrə növünün və normasının verilməsi üçün  torpaqların mütləq qaydada laboratoriyada analiz olunması olduqca vacibdir.