Naxçıvanda kənd təsərrüfatının inkişafı və əhalinin məşğulluq səviyyəsinin artırılması istiqamətində işlər davam etdirilir.

Bu sahədə həyata keçirilən tədbirlərin ardı olaraq muxtar respublikada şəkər çuğunduru və şəkər  istehsalına başlanılması, o cümlədən emal müəssisəsinin yaradılması üçün müzakirələr aparılır.

Bununla bağlı Naxçıvan Muxtar Respublikası Kənd Təsərrüfatı Nazirliyində “Azersun Holdinq” MMC və "Azərşəkər" İstehsalat Birliyinin nümayəndələri ilə görüş keçirilib.

Görüşdə Naxçıvan Muxtar Respublikasında şəkər çuğunduru və şəkər istehsalına başlanılması, emal müəssisəsi yaradılması istiqamətində geniş müzakirələr aparılıb.

“Azərbaycan Respublikası Prezidentinin Sərəncamı ilə təsdiq olunan “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nda qarşıya qoyulan vəzifələr sırasında şəkər istehsalı əsas hədəflərdəndir. Muxtar respublikanın torpaq-iqlim şəraiti şəkər və qənnadı məmulatlarının istehsalında əsas xammal mənbəyi olan şəkər çuğundurunun becərilməsi və ondan yüksək məhsul alınması üçün əlverişlidir”,- deyən Naxçıvan Muxtar Respublikası kənd təsərrüfatı naziri vəzifələrini müvəqqəti icra edən, nazir müavini Xəyalə Dadaşova bu işdə birgə fəaliyyətin labüd olduğunu diqqətə çatdırıb.

Bu ilin ötən dövrü ərzində Naxçıvanda kənd təsərrüfatının inkişafı istiqamətində görülən işləri də diqqətə çatdıran Xəyalə Dadaşova nazirliyin yerli və xarici investorlarla birgə fəaliyyət üçün olduqca maraqlı olduğunu bildirib.

Sonra şəkər çuğunduru və şəkər istehsalı barədə təklif və tövsiyələr dinlənilib.

Bildirilib ki, artıq  muxtar respublika ərazisində şəkər çuğunduru istehsalı üçün mövcud torpaq sahələrinə baxış keçirilib. İlkin mərhələdə müəyyənləşdirilən sahələrdə şəkər çuğundurunun əkin prosesinin həyata keçirilməsi, sonrakı mərhələdə isə emalı müəssisəsinin yaradılması nəzərdə tutulub.