Naxçıvanda baramaçılıq və ipəkçilik ənənələri dirçəldilir

Vaxtilə Naxçıvan Muxtar Respublikasının Ordubad rayonu ipəkçiliyin inkişaf etdiyi və ipəyi ilə dünyada tanınan bir bölgə olub. Son illər bu sahəyə diqqət o qədər çox olmadığından məhv olmaq təhlükəsi qarşısında qalan baramaçılıq artıq yenidən bərpa edilir.

Cari ildə Naxçıvan Muxtar Respublikası Kənd Təsərrüfatı Nazirliyi ilə Türkiyə Respublikasının Kənd Təsərrüfatı və Meşə Nazirliyinin əməkdaşlığı çərçivəsində Ordubad rayonunun “Əylis düzü” adlanan ərazisində Ümummilli Lider Heydər Əliyevin 100 illiyi münasibətilə “Azərbaycan – Türkiyə ipək bağı” salınması bu sahədə atılan mühüm addımlardandır.  İki ölkə arasındakı dostluğun və qardaşlığın rəmzi olan, 1,2 hektar ərazidə yeni salınan bağda Türkiyədən gətirilmiş 600-dən artıq tut tingi əkilib. Baramaçılığın inkişafında yem bazasının təşkili üçün bağın sahəsinin növbəti mövsümdə genişləndirilməsi nəzərdə tutulub.

Bundan başqa Ordubad rayonunda yararsız hala düşmüş Ordubad Barama Toxumu Zavoduna, o cümlədən baramaqurutma, baramaaçma və ipək istehsalı istiqamətli fabrikə də baxış keçirilib, fəaliyyətin bərpasının təmin olunması istiqamətində yerli və xarici investorlarla danışıqlar aparılıb. 2 sentyabr tarixində Ordubad şəhəri, Heydər Əliyev prospektində yerləşən “Ordubad İpək” ASC-nin istehsalat sahəsinin yenidən qurularaq fəaliyyətinin bərpası istiqamətində Naxçıvan Muxtar Respublikasının Kənd Təsərrüfatı Nazirliyi, Naxçıvan Muxtar Respublikasının İqtisadiyyat Nazirliyi və Türkiyə Respublikasında fəaliyyət göstərən “HAN İPEKÇİLİK KUYUMCULUK GIDA İTH.İHR.SAN.TİC.LTD ŞTİ” şirkərti arasında üçtərəfli razılaşma imzalanıb.

Qeyd edək ki, Azərbaycan Respublikası Prezidentinin Sərəncamı ilə təsdiq olunan “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nda qarşıya qoyulan vəzifələr sırasında baramaçılıq və ipəkçiliyin inkişafı prioritet kimi qeyd edilib. Proqramın icrası muxtar respublikada gələcəkdə baramaçılıq və ipəkçilik ənənələrinin bərpası və inkişafında mühüm rol oynayacaq, bu sahədə məşğulluğun təmin olunmasına şərait yaradacaq.