Yaralı bezoar dağ keçisinə baxış keçirilib

Naxçıvan Muxtar Respublikası Ekologiya va Təbii Sərvətlər Nazirliyi, Naxçıvan Regional Dövlət Aqrar İnkişaf Mərkəzi və Naxçıvan Aqrar Xidmətlər Mərkəzinin əməkdaşları Babək rayonunun Nəhəcir kəndində Şamxal Ələkbərova məxsus təsərrüfatda mühafizə olunan yaralı bezoar dağ keçisinə baxış keçiriblər.
 

Qeyd edək ki, Nəhəcir kəndində bezoar dağ keçisi ərazidə otlayarkən qayalıqdan düşərək arxa ayağından zədə alıb. Kənd sakini Cəfər Ələkbərov ərazidə öz təsərüfatındakı heyvanları otararkən Nəhəcir dağının ətəyində daşlara sıxılmış vəziyyətdə heyvanı tapıb və onu oğlu Şamxal Ələkbərovun təsərrüfatında mühafizəyə alıb.

Baytarlar tərəfindən dağ keçisinin zədə almış ayağına baxış keçirilib, yaranın sağalması üçün məlhəm sürülüb. Xüsusi mühafizə olunan bezoar dağ keçisi bir neçə gün də müalicə olunduqdan sonra təbiətə buraxılacaq.