Kəngərli rayonunda torpaq mülkiyyətçiləri və sahibkarların iştirakı ilə seminar-müşavirə keçirilib

     Naxçıvan Muxtar Respublikası Kənd Təsərrüfatı və İqtisadiyyat nazirliklərinin əməkdaşları tərəfindən  Kəngərli Rayon İcra Hakimiyyəti ilə birlikdə Qıvraq qəsəbəsində "Qarğıdalı və günəbaxan bitkilərinin əkilməsində aparılan aqrotexniki tədbirlər və bu bitkilərin iqtisadi səmərəsi" mövzusunda torpaq mülkiyyətçiləri və sahibkarların iştirakı ilə seminar-müşavirə keçirilib.       
     Müşavirəni Kəngərli Rayon İcra Hakimiyyətinin əməkdaşı Ağa Seyidov açaraq rayonda kənd təsərrüfatının inkişafı istiqamətində aparılan ardıcıl tədbirlərdən danışıb.

      Kənd Təsərrüfatı Nazirliyinin şöbə müdiri Xaliq Abbasov qeyd edib ki, qarğıdalı və günəbaxan muxtar respublikanın iqlim şəraitində  uyğun olan bitkilərdir. Bu məhsuldar bitkilərin əkilməsinə təsərrüfat sahibləri tərəfindən maraq ildən-ilə artır. İqtisadi baxımdan sərfəli olan qarğıdalı və günəbaxan həm də qida elementləri ilə zəngindir. Bu bitkilərin geniş şəkildə əkilib-becərilməsi qida sənayesi ilə yanaşı həmdə heyvandarlıq sahəsinin inkişafına öz töhfəsini verir. İstehsalçılar yüksək məhsuldarlıq əldə etmək üçün xəstəliklərə davamlı toxumlardan istifadə etməlidir. Həmçinin torpaqlarlardan düzgün istifadə, əkin və gübrələmənin vaxtında aparılması, düzgün suvarma və digər vacib aqrotexniki tədbirlər diqqətə çatdırılıb. Qeyd edilib ki, bitki köklərinə ziyan vurmasın deyə suvarma şırım üsulu ilə aparılmalıdır.

       İqtisadiyyat Nazirliyinin şöbə müdiri Xudakərim Məmmədov qarğıdalı və günəbaxan bitkilərinin qida sənayesi üçün əhəmiyyətindən danışıb. Bildirilib ki, qarğıdalı və günəbaxan günümüzün ən önəmli yağlı bitkilərindəndir. Bu bitkilərin yağı keyfiyyət baxımından qida sənayesində istifadə edilən bitki yağları arasında ilk sıranı tutur. Qeyd olunub ki, 2022-ci ildə muxtar respublikamızda yerli xammal hesabına qarğıdalı və günəbaxan yağı istehsal ediləcək. Hazırda tikintisi davam etdirilən Şərur Sənaye Məhəlləsində qarğıdalı və günəbaxan bitkilərindən yağ emalı müəssisəsi yaradılır və bunun üçün xammal ehtiyatının yaradılması da qarşıda duran əsas məsələlərdəndir. Bu ilin muxtar respublikada “Sənaye ili” elan edilməsi emal sahəsində də uğurlu işlərin həyata keçirilməsinə stimul olacaqdır.

      Kənd Təsərrüfatı Nazirliyinin sektor müdiri Valeh Mehdiyev aqrotexniki tədbirlərin aparılmasında müasir texnikaların rolundan, baş məsləhətçisi Yaşar Quliyev əkindən əvvəl toxumların dərmanlanmasının əhəmiyyətindən danışıb.

         Sonda sahibkarları maraqlandıran suallar cavablandırılıb və mütəxəssislər tərəfindən hazırlanan maarifləndirici bukletlər iştirakçılara paylanıb.

           Naxçıvan Muxtar Respublikası 

Kənd Təsərrüfatı Nazirliyinin mətbuat xidməti