Naxçıvan Kənd Təsərrüfatı Elm-Tədqiqat İnstitutunun fəaliyyət istiqamətləri müəyyənləşib

Akademik Həsən Əliyev adına  “Araz” Elm-İstehsalat Birliyi və Toxumçuluq və Bitkilərin Mühafizə İdarəsinin bazasında Akademik Həsən Əliyev adına Naxçıvan Kənd Təsərrüfatı Elmi-Tədqiqat İnstitutu yaradılıb. Naxçıvan Muxtar Respublikası Kənd Təsərrüfatı Nazirliyində bununla bağlı tədbir keçirilib. Tədbirdə Elm-Tədqiqat İnstitutunun direktor müavini Günel Seyidzadə kollektivə təqdim edilib, institutun  fəaliyyət istiqamətləri barədə məlumat verilib.

Kənd Təsərrüfatı Nazirliyinin Aparat rəhbəri Vüsal İbrahimov  Elmi-Tədqiqat İnstitutunun direktor müavini təyin edilən Günel Seyidzadəni kollektivə təqdim edib, onun  haqqında məlumat verib. Qeyd edib ki, Aqrar elmləri üzrə fəlsəfə doktoru, dosent Günel Seyidzadə Naxçıvan Muxtar Respublikası Kənd Təsərrütatı Nazirliyinin Aqrar siyasət, risklərin təhlili və idarə olunması şöbəsinin Kənd təsərrüfatının ekologiyası, iqlim dəyişmələri, fitosanitar və baytarlıq risklərinin araşdırılması sektorunun müdiri vəzifəsində çalışıb. O, bundan öncə   uzun illər Azərbaycan Milli Elmlər Akademiyası, Naxçıvan Bölməsinin Bioresurslar İnstitutunda böyük elmi işçi kimi faəliyyət göstərib.  Günel Seyidzadə Naxçıvan Tibb Texnikumu və Naxçıvan Dövlət Universitetində pedaqoji fəaliyyətlə də məşğul olub. O, 60 elmi əsər, 1 monoqrafiya müəllifidir.

 Elm-Tədqiqat İnstitutunun yeni təyin olunan direktor müavini Günel Seyidzadə qeyd edib ki, Kənd Təsərrüfatı Nazirliyində çalışdığı müddətdə verilən tapşırıqlara uyğun olaraq “Araz” Elmi-İstehsalat Birliyi və Toxumçuluq və Bitkilərin Mühafizə İdarəsinin  fəaliyyəti ilə yaxından tanış olub. O, deyib ki,  hər iki qurumun fəaliyyəti qaneedici deyil. Bu günə qədər lazımi səviyyədə elmi tədqiqat işləri aparılmayıb. 

Diqqətə çatdırılıb ki, artıq bu sahədə yeni mərhələ başlayır. Elm-tədqiqat institutunun yaradılması  muxtar respublikada kənd təsərrüfatının inkişafında mühüm rol oynayacaq. İnstitut fəaliyyətini genişmiqyaslı elmi tədqiqatların aparılması istiqamətində quracaq. Bu məqsədlə instituta yeni peşəkar kadrlar da cəlb olunacaq.