Muxtar respublikada ilk dəfə əkini həyata keçirilən kinoa bitkisinin təcrübə sahəsində müşahidələr aparılıb

Naxçıvan Muxtar Respublikası Kənd Təsərrüfatı Nazirliyinin mütəxəssisləri cari ildə sınaq məqsədilə Əliabad qəsəbəsində 0,5 hektar sahədə həyata keçirilmiş kinoa bitkisinin mövcud vəziyyətinin qiymətləndirmə prosesində iştirak ediblər.

Qiymətləndirmə zamanı bitkinin inkişafının qənaətbəş olduğu müəyyən edilib.

Kinoa bitkisi orqanik olaraq becərilib, becərilmə zamanı kimyəvi maddələrdən istifadəyə yol verilməyib. Alaq otları mexaniki yolla təmizlənib, tələb olunan suvarma suyu vaxtında təmin olunub.

Qeyd edək ki, bitkinin sınağına cari ilin aprel ayında Naxçıvan Muxtar Respublikası Kənd Təsərrüfatı Nazirliyinin Toxumçuluq və Bitkilərin Mühafizəsi İdarəsinin mütəxəssisləri tərəfindən başlanılıb. Hal-hazırda bitki mum yetişmə fazasındadır. İyulun sonu, avqustun birinci ongünlüyündə bitkinin biçininin həyata keçirilməsi nəzərdə tutulur.