Muxtar respublikada taxıl biçinin gedişi diqqətdə saxlanılır

Cari ildə taxıl biçininin operativ, vaxtında və itkisiz həyata keçirilməsi, o cümlədən texnikaların istifadəsi zamanı istismar qaydalarına düzgün riayət edilməsi, yanğın, əməyin mühafizəsi və texniki təhlükəsizlik qaydalarının vacibliyini nəzərə alaraq, Naxçıvan Muxtar Respublikası Kənd Təsərrüfatı Nazirliyində yaradılan Mərkəzi Qərargahın üzvləri Ordubad və Culfa rayonlarında taxıl biçinində iştirak edən mexanizatorlarla görüşüb, taxıl biçininin gedişi ilə maraqlanıblar.

Qərargah üzvləri tərəfindən mexanizatorlara yanğından mühafizə və texnikaların istismar qaydaları izah edilmiş, eyni zamanda kombaynların və digər texnikaların fırlanan mexanizmlərinə dolaşan küləş kütləsinin vaxtlı-vaxtında təmizlənməsi tövsiyə olunmuşdur.

O cümlədən Fövqəladə Hallar Nazirliyinin əməkdaşı tərəfindən kombaynlardakı yanğınsöndürmə balonların sazlığı yoxlanılmış və ondan istifadə qaydaları mexanizatorlara və sahibkarlara əyani olaraq göstərilmişdir.