Xəyalə Dadaşova Naxçıvan Dövlət Universitetində olub

16 iyun 2023-cü il tarixdə Naxçıvan Muxtar Respublikasının kənd təsərrüfatı naziri vəzifəsini müvəqqəti icra edən, nazir müavini Xəyalə Dadaşova və Nazirliyin digər məsul şəxsləri Naxçıvan Dövlət Universitetində Təbiətşünaslıq və kənd təsərrüfatı fakültəsinin “Torpaqşunaslıq və aqrokimya” və “Biologiya” ixtisasları üzrə keçirilən yekun dövlət attestasiyasında iştirak edib.

Attestasiyadan sonra X.Dadaşova Naxçıvan Dövlət Universitetinin Təbiətşünaslıq və kənd təsərrüfatı fakültəsinin laboratoriyaları, sinif otaqları, mövcud avadanlıqlar və əyani vəsaitlərlə tanış olub.

Kənd təsərrüfatı sahəsində elmi-tədqiqat işlərinin aparılması, kadr potensialının gücləndirilməsi və s. bu kimi istiqamətlərdə birgə fəaliyyətin təşkili məqsədilə Naxçıvan Muxtar Respublikası Kənd Təsərrüfatı Nazirliyi ilə  Naxçıvan Dövlət Universiteti arasında anlaşma memorandumunun imzalanması razılaşdırılıb.