Muxtar respublikada taxıl biçini davam edir

Hər il olduğu kimi bu il də Naxçıvan Muxtar Respublikasında taxıl biçini mövsümünə Ordubad rayonunda start verilib.

Ümumilikdə, bu il muxtar respublikada 21 min 247 hektar sahədə taxıl əkilib. Onun 485 hektarını yaz əkinləri təşkil edir. 

2023-cü ildə Naxçıvan Muxtar Respublikasında taxıl yığımının itkisiz və vaxtında həyata keçirilməsi ilə əlaqədar işlərin koordinasiyasını təmin etmək məqsədilə Naxçıvan Muxtar Respublikası Kənd Təsərrüfatı Nazirliyində Mərkəzi Qərargah yaradılıb. Biçində iştirak edəcək mexonizatorlarla maarifləndirici söhbətlər aparılıb, texnika  və texnoloji avadanlıqlar hazır vəziyyətə gətirilib. Taxıl  biçini  kampaniyasına  “Naxçıvan Aqrolizinq” ASC-də və hüquqi və fiziki şəxslərdə olan 91 kombayn cəlb olunub.

Biçin dövründə sahələrdə yanğın təhlükəsizliyinin etibarlı təmini ilə əlaqədar Fövqəladə Hallar Nazirliyinin yanğınsöndürmə qrupları biçin aparılan ərazilərdə xidmət aparır.

Qeyd edək ki, hazırda muxtar respublikanın Ordubad, Culfa, Babək, Kəngərli, Şərur və Sədərək rayonlarında taxıl biçini davam edir. Bu günə qədər 680,9 hektar sahədə taxıl biçini başa çatıb və sahələrdən 1424,8 ton məhsul yığılıb.