Naxçıvan Muxtar Respublikasında fitosanitar və epizootik monitorinqlər gücləndirilib

Naxçıvan Muxtar Respublikası Kənd Təsərrüfatı Nazirliyində iki istiqamət üzrə monitorinq qrupları yaradılıb. Fitosanitar monitorinq qrupu Naxçıvan Muxtar Respublikası Kənd Təsərrüfatı Nazirliyinin, Ekologiya və Təbii Sərvətlər Nazirliyinin, “Naxçıvan Yaşıllaşdırma Xidməti” publik hüquqi şəxsinin və rayon (şəhər) icra hakimiyyəti orqanlarının əməkdaşlarından,  epizootik monitorinq qrupu isə Səhiyyə Nazirliyinin, Kənd Təsərrüfatı Nazirliyinin, Dövlət Baytarlıq Xidmətinin, o cümlədən rayon (şəhər) icra hakimiyyəti orqanlarının əməkdaşlarından təşkil edilib. Monitorinq Naxçıvan şəhəri də daxil olmaqla muxtar respublikanın rayonlarını əhatə edir. Monitorinqlər zamanı Naxçıvan Muxtar Respublikasının fitosanitar və epizootik vəziyyəti müəyyən etməklə yanaşı, bitki və bitkiçilik məhsullarının əkinlərinin qeydiyyatının aparılması, zərərli orqanizmlərin yayılma areallarının müəyyən edilməsi, heyvanların növlər üzrə baş sayının dəqiqləşdirilməsi və bu kimi tədbirlər də həyata keçirilir.

Sözügedən məsələlərlə bağlı bu gün Nazirlikdə görüş keçirilib, işçi qruplarına əlavə tapşırıq və tövsiyələr verilib.

Qeyd edək ki, hazırda zərərli orqanizmlər aşkar edilən meşəətrafı ərazilərdə Naxçıvan Muxtar Respublikası Fövqalədə Hallar Nazirliyinin texnikalarından istifadə edilməklə müvafiq mübarizə tədbirlərinin həyata keçirilməsi təmin edilir.