Kənd Təsərrüfatı Nazirliyində Beynəlxalq Kənd Təsərrüfatı sərgisində iştirak edəcək sahibkarlar və ziyarətçilərlə görüş keçirilib

Kənd təsərrüfatı nazirinin müavini, nazir vəzifələrini müvəqqəti icra edən Xəyalə Dadaşova 2023-cü ilin 17-19 may tarixlərində Bakı Ekspo Mərkəzində keçiriləcək 28-ci Azərbaycan Beynəlxalq Qida Sənayesi “İnterFood Azerbaijan” və 16-cı Azərbaycan Beynəlxalq Kənd Təsərrüfatı “Caspian Agro” sərgilərində Naxçıvanı təmsil edəcək sahibkarlar və ziyarətçilərlə görüşmüşdür.

Görüşdə Xəyalə Dadaşova iştirakçılara sərgilərin məqsəd və mahiyyəti haqqında ətraflı məlumat verərək bildirmişdir ki, sərgilərdə Naxçıvan Muxtar Respublikasının təmsil olunması bir yenilik olmaqla yanaşı muxtar respublikanın fermerlərinə, eləcədə aqrar sahənin inkişafına stimul verəcəkdir. O, həmçinin bu il keçiriləcək sərgilərdə dünyanın 31 ölkəsindən 479 şirkətin təmsil olunacağını vurğulayıb.

O, deyd edib ki, muxtar respublika fermerləri ilk dəfədir  bu sərgidə iştirak edəcəkdir. Həmin sərgidə fermerlərə istehsal etdikləri məhsulların nümayişi üçün 27 m²-lik ərazi ayrılmışdır.

Sərgilərdə muxtar respublikada istehsal olunan müxtəlif növ kənd təsərrüfatı məhsulları, meyvə quruları, ət və ət məhsulları, süd və süd məhsulları, müalicəvi bitkilər, mineral sular, Naxçıvan duzu, mürəbbələr, turşular və digər məhsullar orqanik adı altında yaradılmış stentdə nümayiş olunacaq. Məqsəd Naxçıvanda istehsal olunan məhsullarının orqanikliyini önə çəkməklə, gələcəkdə fermerlərin biznes fəaliyyətini genişləndirməkdən ibarətdir.

Sonda sərginin tanıtımı haqqında çəkilmiş vidoçarx nümayiş edilib.