Kəngərli rayonunda arıçılarla görüş keçirilib

Naxçıvan Muxtar Respublikası Kənd Təsərrüfatı Nazirlyinin Heyvandarlıq, damazlıq işi və otlaqlar şöbəsinin əməkdaşları tərəfindən Kəngərli Rayon İcra Hakimiyyətinin nümayəndələri ilə birlikdə Çalxanqala kəndində arıçılıqla məşğul olan sahibkarların iştirakı ilə “Arıçıların yaz qayğıları və arıçılıqda yeni texnologiyaların tətbiqinin əhəmiyyəti” mövzusunda maarifləndirici görüş keçirilib.

Görüşüdə Kəngərli Rayon İcra Hakimiyyətinin əməkdaşı Ağa Seyidov son illər rayonda arıçılığa marağın artmasından və bu sahəyə göstərilən dövlət dəstəyindən danışıb.

Kənd Təsərrüfatı Nazirliyinin əməkdaşları yaz aylarında arılara zoobaytar qaydalarına uyğun qulluq edilməsindən və tempuraturun aşağı olduğu dövrlərdə arı ailələrinə ilkin yaz yoxlanışının aparılmasının əhəmiyyətindən danışıblar. O cümlədən arıçılıqda müasir üsulların tətbiqi ilə arı ailələrinin sayının artırılması, damazlıq və ana arı yetişdirilməsinin təşkili, köçəri arıçılığın inkişafı, xəstəliklərə qarşı mübarizə tədbirlərinin aparılması, arıçılıq məhsullarının istehsalı, tədarükü, emalı və qablaşdırılması haqqında tədbir iştirakçılarına ətraflı məlumat verilib.

Tədbirin sonunda təsərrüfat sahiblərini maraqlandıran suallar cavablandırılıb. Mütəxəssislər tərəfindən hazırlanan bukletlər onlara təqdim olunub.

Daha sonra təsərrüfat sahibi Şəmsi Nəcəfovun arıxanasında arı ailələrinə baxış keçirilib, mövcud vəziyyət qiymətləndirilib və aşkar olunan problemlərin həll yolları arıçılara izah edilib.