Təsərrüfat sahibləri ilə növbəti maarifləndirici tədbir Ordubad rayonunda keçirilib

Naxçıvan Muxtar Respublikası Kənd Təsərrüfatı Nazirliyinin Toxumçuluq və Bitkilərin Mühafizəsi İdarəsinin əməkdaşları “Erkən yazda meyvə bağlarında aparılacaq aqrotexniki tədbirlər, xəstəlik və zərərvericilərə qarşı kimyəvi mübarizə tədbirlərinin aparılması” mövzusunda növbəti maarifləndirici tədbiri Ordubad Rayon İcra Hakimiyyətinin nümayəndələri ilə birlikdə Sabirkənd kəndində keçiriblər.

Tədbirdə əməkdaşlar yaz aylarında meyvə bağlarında aparılacaq aqrotexniki tədbirlərdən danışıb, ağaclarda budama işinin aparılmasını əyani olaraq göstərib. Meyvə ağaclarının xəstəliklərindən dəmgil, zərərvericilərindən şərq meyvəyeyəni, alma və qoz meyvəyeyəninə qarşı istifadə olunan dərman preparatlarından, onların norma və istifadə qaydaları haqqında təsərrüfat sahiblərinə məlumat verilib.