Novruz bayramı yarmarkası fəaliyyətə başlayıb

Naxçıvan şəhərində Novruz bayramı ilə əlaqədar əhalinin ərzaq və kənd təsərrüfatı məhsulları ilə təminatının yaxşılaşdırılması, istehlakçıların seçim imkanlarının artırılması, eləcə də süni qiymət artımının qarşısının alınması məqsədi ilə 13 mart 2023-cü il tarixdən başlayaraq 19 mart 2023-cü il tarixədək Naxçıvan şəhəri mərkəzi bazarda kənd təsərrüfatı məhsullarının satış yarmarkası təşkil edilib. Yarmarkaya Naxçıvan şəhəri və rayonlardan təsərrüfat sahibləri və bir sıra müəssisələr qatılıb.

Yarmarkada bayram süfrəsi üçün lazım olan müxtəlif çeşiddə ərzaq məhsulları,  meyvə-tərəvəz, şirniyyat, çərəzlər, ət-süd,  balıq və digər məhsullar bazar qiymətlərinə nisbətən ucuz qiymətə alıcılara təklif edilir.

Naxçıvan Muxtar Respublikası Baş nazirin birinci müavini Elşad Əliyev və aidiyyəti dövlət qurumlarının rəhbərləri yarmarkada iştirak edib, ərzaq məsullarının qiymətləri, təsərrüfat sahiblərinin, eləcə də alıcıların problem və tələbləri ilə maraqlanıblar.