Kənd təsərrüfatı məhsullarının satış yarmarkası davam edir

Naxçıvan Muxtar Respublikasında kənd təsərrüfatı məhsullarının satış yarmarkası mütəmadi olaraq hər həftənin şənbə və bazar günləri keçirilir. Yarmarkanın keçirilməsində əsas məqsəd əhalinin kənd təsərrüfatı məhsullarına olan tələbatının yerli istehsal hesabına ödənilməsi, yerli kiçik və orta sahibkarların təsərrüfatlarının inkişafına kömək göstərilməsi və onların istehsal etdikləri məhsulların birbaşa satışının təşkil edilməsidir. Təsərrüfat sahibləri yarmarkada piştaxta və tərəzi ilə ödənişsiz olaraq təmin edilirlər. Satışa çıxarılan məhsullar digər bazarlardan daha münasib qiymətə təklif olunur. Eyni zamanda məhsulların keyfiyyətinə nəzarət edilir.

Bu gün Naxçıvan Muxtar Respublikası kənd təsərrüfatı nazirinin müavini Xəyalə Dadaşova Naxçıvan şəhərində təşkil olunan kənd təsərrüfatı məhsullarının satışı yarmarkasında olub. Yarmarkanın fəaliyyəti, məhsulların keyfiyyəti və qiymətləri ilə maraqlanıb.