Heyvandarlığın inkişafı ilə bağlı tədbir keçirilib

“Heyvandarlığın inkişaf etdirilməsi, süni mayalanma tədbirlərinin aparılmasının üstünlükləri və ənənəvi süd məhsullarının istehsalının əhəmiyyəti” mövzusunda Naxçıvan Muxtar Respublikası Kənd Təsərrüfatı Nazirliyinin Heyvandarlıq, damazlıq işi və otlaqlar şöbəsinin mütəxəssisləri Culfa Rayon İcra Hakimiyyətinin nümayəndələri ilə birlikdə Culfa rayon Saltaq kəndində heyvandarlıqla məşğul olan sahibkarlarla görüş keçirib.

Tədbiri Culfa Rayon İcra Hakimiyyətinin əməkdaşı Xaliq Məmmədov açaraq rayonda heyvandarlığın inkişafından və bu sahəyə göstərilən dövlət dəstəyindən, Kənd Təsərrüfatı Nazirliyinin şöbə müdiri Əyyub Abdullayev muxtar respublikada qoyunçuluğun inkişaf etdirilməsində döl kompaniyasının mütəşəkkil keçirilməsinin əhəmiyyətindən, mal-qaranın cins tərkibinin yaxşılaşdırılmasında süni mayalanma tədbirlərinin aparılmasının üstünlüklərindən danışıb.

Nazirliyin baş məsləhətçisi Rasim Hacıyev heyvandarlıqda yem bazasının yaxşılaşdırılması, qış və yay otlaqlarından düzgün istifadə və otlaqlarda alaq otlarına qarşı mübarizə tədbirlərinin aparılması haqqında təsərrüfat sahiblərinə məlumat verib.

Nazirliyin digər əməkdaşları hevandarlıqda faraş dölün saxlanma şəraiti, onlara zoobaytar qaydalarına uyğun qulluq edilməsi, baytarlıq tədbirlərinin vaxtında və düzgün aparılması, süd sağımında və ənənəvi süd məhsullarının hazırlanmasında gigiyenik qaydalara əməl olunmasından və istehsal olunan məhsulların düzgün saxlanma qaydalarından danışaraq təsərrüfat sahiblərinə tövsiyələr veriblər.

Sonda təsərrüfat sahiblərini maraqlandıran suallar cavablandırılıb. Mütəxəssislər tərəfindən hazırlanan bukletlər tədbir iştirakçılarına paylanıb.