Yaz əkinlərinin gedişi ilə bağlı müşavirə keçirilib

Naxçıvan Muxtar Respublikası Kənd Təsərrüfatı Nazirliyinin mütəxəssisləri Naxçıvan Şəhər İcra Hakimiyyəti ilə birlikdə Əliabad qəsəbəsində torpaq mülkiyyətçiləri və sahibkarların iştirakı ilə “Aqrar sahədə qarşıya qoyulan vəzifələrin icrası və yaz tarla işlərinin gedişi” mövzusunda müşavirə keçirib.

Müşavirəni Naxçıvan Şəhər  İcra Hakimiyyətinin nümayəndəsi Səyyad Əliyev açaraq  aqrar sahənin prioritet istəqamətlərindən biri olduğunu, Azərbaycan Respublikasının Prezidenti tərəfindən kənd təsərrüfatının inkişaf etdirilməsinə dair bir sıra tapşırıqlar verildiyini və hazırda bu istiqamətdə işlərin aparılığını qeyd edib.

Kənd Təsərrüfatı Nazirliyinin baş məsləhətçisi Əli Hüseynov erkən yazda sahələrin əkin üçün hazırlanmasından, zərərli orqanizmlərə qarşı davamlılığın artırılması üçün toxumların dərmanlanmasından və payızlıq taxıllara yemləmə gübrələrinin verilməsinin məhsuldarlığa təsirindən danışıb. Həmçinin kartof əkinlərinin erkən yazda aparılmasının məhsuldarlığın artırılmasına olan təsiri müşavirə iştirakçılarının diqqətinə çatdırılıb.

Daha sonra Nazirliyin əməkdaşı Fəxrəddin Əliyev torpaq mülkiyyətçilərinə kənd təsərrüfatı məhsullarına veriləcək subsidiya əmsalları və ödənişləri barədə məlumat verib.

Sonda tədbir iştirakçılarını maraqlandıran suallar cavablandırılıb.