Şərur rayonunda aqrar sahənin inkişaf etdirilməsi ilə bağlı müşavirə keçirilib

Naxçıvan Muxtar Respublikası Kənd Təsərrüfatı Nazirliyinin mütəxəssisləri  Şərur Rayon İcra Hakimiyyətinin əməkdaşları ilə birgə rayonun Məmmədsabir kəndində “Aqrar sahənin inkişaf etdirilməsi və qarşıda duran vəzifələr” mövzusunda müşavirə keçiriblər.

Müşavirəni Şərur Rayon İcra Hakimiyyətinin əməkdaşı Osman Cəlil açaraq rayonda kənd təsərrüfatı sahəsində görülmüş işlərdən, ailə təsərrüfatlarının fəaliyyətindən və əldə olunmuş uğurlardan danışıb.

Nazirliyin şöbə müdiri Xaliq Abbasov kənd təsərrüfatının inkişafı haqqında çıxış edərək bildirib ki, nazirlik tərəfindən muxtar respublikada Azərbaycan Respublikası Kənd Təsərrüfatı Nazirliyinin Elektron Kənd Təsərrüfatı İnformasiya Sistemindən istifadə ilə bağlı lazımi tədbirlər həyata keçirilir. Sistemin üstün cəhətləri ondan ibarətdir ki, əkinlərin bəyan edilməsi və həmin sahələrə dövlət dəstəyi şəffaf formada həyata keçirilir.

Həmçinin çıxışda Azərbaycan Respublikası Prezidentinin 2019-cu il 27 iyun tarixli 759 nömrəli Fərmanı ilə təsdiq edilmiş “Kənd təsərrüfatı məhsulları istehsalının subsidiyalaşdırılması qaydası”nda nəzərdə tutulan tədbirlər və 2023-cü il üçün əkin əmsalları haqqında torpaq mülkiyyətçilərinə ətraflı məlumat verilib.

Nazirliyin sektor müdiri Valeh Mehdiyev aqrar sahənin inkişafında müasir kənd təsərrüfatı texnika və texnoloji avadanlıqlarının əhəmiyyətindən danışıb.

Nazirliyin baş məsləhətçisi Səməddin Əsgərov taxıl sahələrinə yemləmə gübrəsinin norma nisbətinə uyğun verilməsindən, gübrənin məhsuldarlığa təsirindən, əkin sahələrində xəstəlik və zərərvericilərə qarşı kimyəvi mübarizə tədbirlərinin aparılmasında istifadə olunacaq dərman preparatlarından istifadə qaydalarından danışıb.

Sonda təsərrüfat sahiblərini maraqlandıran suallar cavablandırılıb.