Torpaqların qida maddələri ilə təminolunma kartoqramlarının təqdimatı olub

Naxçıvan Muxtar Respublikası Kənd Təsərrüfatı Nazirliyinin tabeli qurumu Akademik Həsən Əliyev adına “Araz” Elm İstehsalat Birliyinin və Naxçıvan Muxtar Respublikası Daşınmaz Əmlak və Torpaq Məsələləri üzrə Dövlət Xidmətinin əməkdaşları Naxçıvan Şəhər İcra Hakimiyyətinin təşkilatçılığı ilə Bələdiyyə sədrlərinin və torpaq mülkiyyətçilərinin iştirakı ilə Naxçıvan Şəhər Əliabad qəsəbəsində “Bitkilərin məhsuldarlığının artırılmasında, gübrələrdən düzgün və səmərəli istifadənin rolu” mövzusunda  müşavirə keçiriblər.

Müşavirəni Naxçıvan Şəhər İcra Hakimiyyətinin əməkdaşı Pərvin Səfərov açıb.

Tədbirdə Akademik Həsən Əliyev adına “Araz” Elm İstehsalat Birliyinin elmi işlər üzrə  direktor  müavini  Rahət Hacıyev “Torpaq münbitliyinin əhəmiyyəti və onun artırılması yolları”,  Aqrokimya, torpaqşünaslıq və  torpaqların kütləvi analizləri şöbəsinin müdiri Fazilə Fərəcova  “Torpaq analizləri və torpaqların qida maddələri ilə təmin olunma  kartoqramlarının əhəmiyyəti”, Naxçıvan Muxtar Respublikası Daşınmaz  Əmlak  və Torpaq Məsələləri üzrə Dövlət Xidmətinin sektor müdiri Oktay Məmmədov “Torpaqlardan səmərəli istifadə və torpaq mülkiyyətçilərinin mülkiyyət hüquqları” mövzularında çıxış ediblər.  

2022-ci ilin iş planına əsasən Akademik Həsən Əliyev adına “Araz” Elm İstehsalat Birliyinin Aqrokimya, torpaqşünaslıq və torpaqların kütləvi analizləri şöbəsinin mütəxəssisləri tərəfindən Naxçıvan şəhər və Əliabad qəsəbə Bələdiyyəsi ərazilərinin kənd təsərrüfatı təyinatlı torpaq sahələrindən götürülən torpaq nümunələrində qida maddələri ilə təmin olunma dərəcələrini müəyyənləşdirmək üçün laboratoriya analizləri aparılıb. Analizlərin nəticələrinə əsasən əkiləcək bitkilərin qida maddələrinə tələbatından və məhsuldarlığından asılı olaraq hər bir bitki üçün üzvi və mineral gübrələrin normaları hesablanıb.

Qida maddələri ilə təminolunma kartoqramları isə Naxçıvan Muxtar Respublikası Dövlət Yerquruluşu, Geodeziya və Kartoqrafiya MMC tərəfindən hazırlanıb.

Sonda Naxçıvan şəhərinin və Əliabad qəsəbəsinin  torpaq kartoqramları  İcra nümayəndələrinə və Bələdiyyə sədrlərinə təhvil verilib və  mülkiyətçiləri maraqlandıran  suallar cavablandırılıb.