Heyvandarlıq təsərrüfatı sahibləri ilə görüş keçirilib

Naxçıvan Muxtar Respublikası Kənd Təsərrüfatı Nazirliyinin mütəxəssisləri tərəfindən Babək Rayon İcra Hakimiyyəti ilə birlikdə Şıxmahmud kəndində heyvandarlıqla məşğul olan sahibkarların iştirakı ilə “Qaramalın cins tərkibinin yaxşılaşdırılması və zoobaytar qaydalarına uyğun yemləndirilməsi” mövzusunda seminar müşavirə keçirilib.

Müşavirəni Babək Rayon İcra Hakimiyyətinin əməkdaşı Azər Hümbətov açaraq rayonda heyvandarlığın inkişafından və bu sahəyə göstərilən dövlət dəstəyindən danışıb.

Nazirliyin şöbə müdiri Əyyub Abdullayev çıxışında qeyd edib ki, muxtar respublika iqtisadiyyatında diqqətçəkən fəaliyyət istiqamətlərindən biri də qaramalın cins tərkibinin yaxşılaşdırılmasıdır. Muxtar respublikada Süni Mayalanma Mərkəzinin yaradılması, dövlət tərəfindən bu fəaliyyət sahəsinin təşviqi ilə bağlı atılan addımlar naxırın cins tərkibinin yaxşılaşdırılmasına şərait yaradıb. Qaramalın cins tərkibinin yaxşılaşdırılması məhsul bolluğuna müsbət təsir etməklə, əhalinin gəlirinin artmasına əsaslı təsir göstərir. Ona görə də naxırın cins tərkibinin yaxşılaşdırılmasına üstünlük verilməlidir.

Nazirliyin aparıcı məsləhətçisi Umar Şükürlü mövzu ərtafında çıxış edərək deyib ki, heyvandarlığın inkişaf etdirilməsi, heyvandarlıq məhsullarının istehsalının artırılması, məhsulun keyfiyyətinin yaxşılaşdırılması və onun maya dəyərinin aşağı salınmasında mühüm məsələlərdən biri qışlama dövründə möhkəm yem bazasının yaradılması ilə yanaşı mal-qaranın tam dəyərli yem payları ilə yemlənməsidir. Heyvandarıq sahəsində qarşıya qoyulan vəzifələr yalnız yem bazasının əsaslı surətdə yaxşılaşdırıldığı şəraitdə yerinə yetirilə bilər. Nəzərə almaq lazımdır ki, heyvanların, xüsusən də yüksək məhsuldar heyvanların düzgün yemlənməsi nəinki, süd, ət və digər heyvandarlıq məhsullarının artmasına səbəb olur, həmçinin normal bala alınmasına da müsbət təsir göstərir.

Nazirliyin baş məsləhətçisi Rasim Hacıyev otlaqlardan səmərəli istifadə edilməsindən danışaraq vurğulayıb ki, otlaqların korlanmaması üçün mal-qara otlaqlarda növbəli şəkildə otarılmalı, yaz aylarında otlaqlarda alaq otları çiçəkləmədən öncə biçilib götürülməli və ya kökündən torpaqdan çıxarılmalıdır. Suvarılan otlaqlar gübrələnib suvarılmalıdır.

Sonda təsərrüfat sahiblərini maraqlandıran suallar cavablandırılıb.