Şahbuz rayonunda maarifləndirici tədbir keçirilib

Naxçıvan Muxtar Respublikası Kənd Təsərrüfatı Nazirliyinin mütəxəssisləri tərəfindən Şahbuz Rayon İcra Hakimiyyəti ilə birlikdə rayonun Sələsüz kəndində torpaq mülkiyyətçilərinin iştirakı ilə “Əkinlərin əkin atlaslarına uyğun aparılması və şırım üsulunun tətbiqinin əhəmiyyəti” mövzusunda maarifləndirici  müşavirə keçirilib.

Müşavirəni Şahbuz Rayon İcra Hakimiyyətinin əməkdaşı Məhəmməd Bayramov açaraq rayonda əkiçilik sahəsində əldə olunmuş uğurlardan danışıb.

Nazirliyinin şöbə müdiri Bəhruz Qasımov toxumun dərmanlanması və şırım üsulunun tətbiqinin əhəmiyyəti haqqında çıxış edərək deyib ki, toxumlar dərmanlanaraq əkildikdə sahələrdə bir çox xəstəliklərin yaranmasının qarşısı alınır və taxılın vegetasiya dövründə digər kimyəvi preparatlardan istifadə edilməsinə ehtiyac qalmır. Məruzəçi şırım üsulunun tətbiqindən danışaraq bildirib ki, muxtar respublika şəraitində taxıl sahələrinin suvarılmasında şırımla suvarma ən əlverişli üsuldur. Bu suvarma üsulu səthi ilə suvarmada suyun ən yaxşı paylanma üsullarından biri sayılır. Səthi yaxşı hamarlanmış və şırım istiqamətində mailliyi az olan taxıl sahələrində bu üsul daha əlverişlidir. Şırımlarla suvarmanın mora ilə suvarmaya nisbətən üstünlüyü suya qənaət edilməsi, torpağın aktiv qatının müntəzəm islanması, torpaq strukturunun pozulmaması, qaysaq əmələ gəlməməsi, torpaq su ilə tam doyduğundan quraqlığa qarşı davamlı olması, suvarmada və becərmədə işlərin mexanikləşdirilməsi üçün əlverişli şərait yaranması və nəticədə bitkilərin məhsuldarlığının artmasıdır.

Kənd Təsərrüfatı Nazirliyinin baş məsləhətçisi Fəxrəddin Əliyev əkinlərin əkin atlaslarına uyğun aparılmasından danışaraq qeyd edib ki, 2011-ci ildə Naxçıvan Muxtar Respublikası Ali Məclisi Sədrinin tapşırıq və tövsiyələri əsasında əkin atlasları hazırlanmış və atlaslara uyğun olaraq hər bir rayonun torpaq təsnifatı nəzərə alınaraq ixtisaslaşma aparılmışdır. Artıq muxtar respublikada payızlıq taxıl əkinlərinin aparılmasına başlanılıb. Torpaq mülkiyyətçiləri əkin növlərindən asılı olaraq əkin üçün yararlı sahələr seçilməli, növbəli əkin sistemi tətbiq etməli,  rayonlaşdırılmış toxum  sortlarından istifadə edərək əkinləri aparmalıdır. Əkin atlaslarına uyğun torpaq sahələri analiz etdirilməli, torpaqların tələbatına uyğun sahələrə mineral və üzvi gübrələr verilməlidir.

Nazirliyin sektor müdiri Valeh Mehdiyev əkinlərin aparılmasında müasir kənd təsərrüfatı texnikaları və aqreqatların üstünlüyündən danışaraq qeyd edib ki, bu gün kənd təsərrüfatının bütün sahələrində əl əməyinin yüngülləşdirilməsində müasir kənd təsərrüfatı texnikaların gücündən səmərəli istifadə olunur.Taxıl əkinlərində şırım üsulunun tətbiqi zamanı aqrotexniki qaydalara əməl olunmalıdır. Sahələrə şırımlar salınarkən şırımların dərinliyi, şırımarası məsafə və şırımların uzunluğu  yer səthinin malliyi və torpağın mexaniki tərkibindən asılıdır. Belə ki, şırımın uzunluğu 100 m - 250 m – 400 m arasında dəyişir.

Sonda təsərrüfat sahiblərini maraqlandıran suallar cavablandırılıb və onlara maarifləndirici bukletlər paylanıb.

Naxçıvan  Muxtar Respublikası 
Kənd Təsərrüfatı Nazirliyinin 

mətbuat xidməti