Kəngərli rayonunda tarla müşavirəsi keçirilib

Naxçıvan Muxtar Respublikası Kənd Təsərrüfatı Nazirliyinin mütəxəssisləri tərəfindən Kəngərli Rayon İcra Hakimiyyəti ilə birlikdə rayonun Böyükdüz kəndində torpaq mülkiyyətçilərinin iştirakı ilə “Payızlıq taxıl əkinlərində aparılacaq aqrotexniki tədbirlər” mövzusunda tarla  müşavirəsi keçirilib.

Müşavirəni Kəngərli Rayon İcra Hakimiyyətinin əməkdaşı Ağa Seyidov açaraq rayonda taxılçılığın inkişafından və bu sahəyə göstərilən dövlət dəstəyindən danışıb.

Kənd Təsərrüfatı Nazirliyinin Bitkiçilik məhsullarının istehsalı, toxumçuluq və aqrokimyəvi xidmət şöbəsinin müdiri Xaliq Abbasov payızlıq taxıl əkinlərində aparılacaq aqrotexniki tədbirlərdən qanışaraq qeyd edib ki, taxılçılıqla məşğul olan fermerlər yadda saxlamalıdır ki, taxıldan yüksək məhsul əldə etmək üçün bütün aqrotexniki tədbirlər vaxtında və keyfiyyətlə yerinə yetirilməlidir. Taxıl əkiləcək sahədə növbəli əkin sistemi tətbiq olunmalı, keyfiyyətli şum aparılmalı, cücərmə və təmizlik faizi yüksək olan dərmanlanmış toxumdan istifadə etməklə əkinlər şırım üsulu ilə optimal müddətdə aparılmalıdır. Şırım üsulunun tətbiqi torpağın soranlaşmasının və su itkisinin qarşısını alır.

Nazirliyin Texniki nəzarət və aqroservis sektorunun müdiri Valeh Mehdiyev və aparıcı məsləhətçisi Vüsal Mirzəyev payızlıq taxıl əkinlərinin aparılmasında müasir kənd təsərrüfatı texnika və avadanlıqların rolundan danışıblar. Qeyd olunub ki, muxtar respublikaya “Naxçıvan Aqrolizinq” ASC-nin xətti ilə hər il aqrotexniki tədbirlərin aparılması üçün kifayət qədər texnika və aqreqatlar alınıb gətirilir. Həmin texnikaların lizinq yolu ilə satışı təşkil olunur ki, bu da aqrotexniki tədbirlərinin aparılmasında əl əməyindən az istifadə olunmaqla yüksək məhsuldarlığa nail olunmasına imkan yaradır.

Müşavirədə toxumun dərmanlanması və şırım üsulu ilə əkin aparılması torpaq mülkiyyətçilərinə əyani olaraq göstərilib.

Sonda iştirakçıları maraqlandıran suallar cavablandırılıb və onlara maarifləndirici bukletlər paylanıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti