Heyvandarlıq təsərrüfatı sahibləri ilə növbəti müşavirə keçirilib

Naxçıvan Muxtar Respublikası Kənd Təsərrüfatı Nazirliyinin mütəxəssisləri tərəfindən Şahbuz  Rayon İcra Hakimiyyəti ilə birlikdə rayonun Ayrınc kəndində heyvandarlıqla məşğul olan təsərrüfat sahiblərinin iştirakı ilə “Mal-qaranın cins tərkibinin yaxşılaşdırılması, qışlamaya hazırlıq və qış otlaqlarından səmərəli istifadə edilməsi” mövzusunda növbəti müşavirə keçirilib.

Müşavirəni Şahbuz Rayon İcra Hakimiyyətinin əməkdaşı Orxan Əlizadə açaraq rayonda heyvandarlığın inkişafı üçün  münbit şəraitin olmasından  və bu sahəyə göstərilən dövlət dəstəyindən danışıb.

Kənd Təsərrüfatı Nazirliyinin şöbə müdiri Əyyub Abdullayev mal-qaranın cins tərkibinin yaxşılaşdırılmasından  danışaraq qeyd edib ki, heyvandarlığı daha mütərəqqi üsullarla inkişaf etdirilməsində vacib amillərdən biri də süni mayalanma tədbirlərinin aparılmasıdır. Süni mayalanma tədbirlərinin aparılması muxtar respublikada heyvandarlığın daha da inkişaf etdirilməsinə, mal-qaranın cins tərkibinin yaxşılaşdırılmasına, heyvandarlıq məhsullarının intensiv artımına və təhlükəli xəstəliklərin yayılmasının qarşısının alınmasına ciddi təsir göstərməyə başlamışdır. Yaradılan süni mayalanma məntəqələri lazımi avadanlıq, nəqliyyat vasitələri, maye azot və törədici toxumları ilə davamlı təmin olunduğundan bu sahədə irəlləyişə nail olunmuşdur.

Nazirliyin baş məsləhətçisi Rasim Hacıyev qış otlaqlardan səmərəli istifadə edilməsinin əhəmiyyətindən danışaraq vurğulayıb ki, muxtar respublikada heyvandarlığı daha mütərəqqi üsullarla inkişaf etdirmək yolu ilə məhsuldarlığı yüksəltmək, yay-qış otlaqlarının və biçənəklərin mühafizəsini gücləndirmək, onlardan istifadənin səmərəsini artırmaq və biomüxtəlifliyin qorunub saxlanılmasını təmin etmək məqsədilə sahibkarlar tərəfindən zəruri tədbirlərin həyata keçirilməsi vacibdir. Torpaqların münbitliyinin artırılması, heyvandarlığın yem bazasının möhkəmləndirilməsi, təbii yem sahələrinin mühafizəsi, otlaqların geobotanik zənginliyinin qorunub saxlanılması mühüm iqtisadi və ekoloji əhəmiyyət daşıyır.

Nazirliyin aparıcı məsləhətçisi Umar Şükürlü heyvandarlıqda qışlama dövrünə hazırlıq mövzusunda çıxış edərək bildirib ki, yüksək məhsuldar cins heyvanlar kifayət qədər yüksək keyfıyyətli yem rasionları ilə yemləndirilmədikdə, bir müddətdən sonra onlardan gözlənilən məhsul alınmayacaq, heyvanlar get-gedə cırlaşacaq və nəhayət cinslilik qabiliyyətini itirəcəklər. Heyvanlar ilin yarısından çoxunu binalarda keçirir ki, bu da mal-qaranın sağlamlığına, məhsuldarlığına əhəmiyyətli dərəcədə təsir göstərir. Buna görə də qışlama ciddi hazırlıq tələb edir. Mal-qara saxlayan hər bir fermer qışlama dövründə mal-qaranın yemlərə, duza və mikroelementlərə olan təlabatını təxmini də olsa müəyyənləşdirib, çatışmayanları tədarük etməlidir.  Qışlama dövrü üçün hər baş davara orta hesabla 150 kq quru ot, 50 kq qüvvəli yem və 2-3 kq xörək duzu tələb olunur. Maldarlıqda isə hər baş inək, camış, boğaz düyə və törədici üçün orta hesabla qışlama dövründə 20 sentner yem vahidi və 9-11 kq xörək duzu tələb olunur. Orta hesabla sağılan inək-camış üçün sutkada 4-6 kq quru ot, 3-4 kq küləş,  2-3 kq qarışıq yemlərdən ibarət yem payı tələbatı ödəmiş olar. Bundan əlavə xörək duzu da hər baş davara sutkada 10-15 qram və hər baş orta yaşlı qaramala 50-60 qram norması nəzərə alınmalıdır.

Sonda təsərrüfat sahiblərini maraqlandıran suallar cavablandırılıb və onlara maarifləndirici bukletlər paylanıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti