Fitosanitar monitorinq aparılıb

Kənd təsərrüfatı bitkilərinin məhsuldarlığına təsir göstərən xəstəlik və zərərvericilərə, alaq otlarına qarşı mübarizə aparmaq kənd təsərrüfatı mütəxəssislərinin qarşısında duran mühüm vəzifələrdəndir. 

Azərbaycan Respublikası Qida Təhlükəsizliyi Agentliyi tərəfindən muxtar respublikada bitkiçilik sahəsində zərərvericilərin monitorinqinin aparılması üçün Naxçıvan Muxtar Respublikası Kənd Təsərrüfatı Nazirliyinə feromon tələlər göndərilib.

Nazirliyin Fitosanitar nəzarəti, bitkilərin mühafizəsi və karantini şöbəsinin mütəxəssisləri tərəfindən feromon tələlər Babək rayon Nehrəm qəsəbə sakini Nağı Nağıyevə məxsus pomidor bitkisi becərilən istixanada zərərvericilərin mövcudluğu və populyasiya sıxlığını araşdırmaq üçün tətbiq edilmişdir.

Qeyd edək ki, quraşdırılmış feromon tələlər şöbə əməkdaşları tərəfindən mütəmadi olaraq yoxlanılmaqla hər on gündən bir qeydiyyatı götürüləcək və zərərvericilərə qarşı təlimata uyğun mübarizə tədbirləri aparılacaq.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti