Tarla müşavirəsi keçirilib

Naxçıvan Muxtar Respublikası Kənd Təsərrüfatı Nazirliyinin, Naxçıvan Muxtar Respublikası Antiinhisar və İstehlak Bazarına Nəzarət Dövlət Xidmətinin, Daşınmaz Əmlak və Torpaq Məsələləri üzrə Dövlət Xidmətinin mütəxəssisləri tərəfindən Kəngərli Rayon İcra Hakimiyyəti ilə birgə rayonun Böyükdüz kəndində “Ailə təsərrüfatlarının inkişafı, torpaqlardan səmərəli istifadə olunması və payızlıq taxıl əkinlərinə hazırlıq” mövzularında torpaq mülkiyyətçiləri və ailə təsərrüfatçılarının iştirakı  ilə tarla müşavirəsi keçirilib.   

Kəngərli Rayon İcra Hakimiyyətinin nümayəndəsi Ağa Seyidov müşavirənin keçirilməsinin  əhəmiyyətindən və rayonda aqrar sahənin inkişafı istiqamətində həyata keçirilən tədbirlərdən danışıb.

Kənd Təsərrüfatı Nazirliyinin baş məsləhətçisi Əli Hüseynov müavirə iştirakçılarına toxumun düzgün seçilməsi və sahələrin suvarılması üçün şırım üsulundan istifadənin səmərəsi haqqında məlumat verərək qeyd edib ki, payızlıq taxıl əkinlərində növbəli əkin sisteminin tətbiqi, torpaq analizinin aparılması və keyfiyyətli şumun aparılması məhsuldarlığa təsir edən amillərdəndir. Mütəxəssis onu da qeyd edib ki, payızlıq taxılların optimal əkin müddətləri dağlıq və dağətəyi ərazilərdə oktyabr ayının birinci ongünlüyünə, aran ərazilərdə isə oktyabr ayının ikinci ongünlüyünə təsadüf edir. Bu müddətdə keçirilən əkinlərdə çıxış vaxtında alınır və kollanma fazası daha tez başa çatır. Bu zaman əkin qış fəslinin əlverişsiz şərtlərinə daha dözümlü olur. Həmçinin vurğulanıb ki, payızlıq taxılların suvarılmasında şırım üsulunun tətbiqi suya qənaət olunması, torpaqların  erroziyadan qorunması və münbitliyin artırılması baxımından ən effektli üsul hesab edilir. Eyni zamanda dəmyə üsulu ilə əkilən taxıl sahələrində şırımların çəkilməsi payız-qış mövsümündə yağan yağış və qar sularının həmin şırımlarda toplanmasına səbəb olur ki, bu da yaranan nəmlikdən bitkilərin uzun müddət yararlanmasına şərait yaradır.

Naxçıvan Muxtar Respublikası Antiinhisar və İstehlak Bazarına Nəzarət Dövlət Xidmətinin əməkdaşı Təvəkkül Vəliyev ailə təsərrüfatlarının inkişaf etdirilməsi və qarşıya qoyulan vəzifələr, Daşınmaz Əmlak və Torpaq Məsələləri üzrə Dövlət Xidmətinin əməkdaşı Oqtay Məmmədov torpaqlardan səmərəli istifadə yolları mövzularında çıxış ediblər.

Sonda təsərrüfat sahiblərini maraqlandıran suallar cavablandırılıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti