Arıçıların iştirakı ilə müşavirə keçirilib

Naxçıvan Muxtar Respublikası Kənd Təsərrüfatı Nazirliyinin, Dövlət Baytarlıq Xidmətinin, “Naxçıvan Muxtar Respublikası Arıçıları” İctimai Birliyinin əməkdaşları tərəfindən  Naxçıvan şəhər İcra Hakimiyyəti ilə birlikdə Tumbul kəndində arıçılıq təsərrüfatı sahiblərinin iştirakı ilə “Arıçılığın inkişaf etdirilməsi, arı ailələrinə qulluq və arıxanalarda baytarlıq tədbirlərinin aparılmasının əhəmiyyəti” mövzusunda müşavirə keçirilib.

Müşavirəni Naxçıvan Şəhər İcra Hakimiyyətinin əməkdaşı Səyyad Əliyev açaraq arıçılığın inkişafına göstərilən dövlət dəstəyindən danışıb.

Tədbirdə Kənd Təsərrüfatı Nazirliyinin şöbə müdiri Əyyub Abdullayev qeyd edib ki, Naxçıvan Muxtar Respublikası Ali Məclisi Sədrinin Sərəncamı ilə təsdiq edilmiş “2017-2022-ci illərdə Naxçıvan Muxtar Respublikasında arıçılığın inkişafı üzrə Dövlət Proqramı”nın və Naxçıvan Muxtar Respublikasında arıçılığın inkişafı ilə bağlı tədbirlər planının icrasına uyğun olaraq bu sahənin inkişafı dövlət tərəfindən daim dəstəklənərək sahibkarlara subsidiya və kreditlər verilir. Muxtar respublikanın əlverişli təbii-iqlim şəraiti, zəngin yem ehtiyatları bazası və qiymətli cinslərə malik arı genefondu bu sahənin inkişaf etdirilməsi üçün geniş imkanlar yaradır. Həmçinin arı ailələrinin köçürülməsi üçün ərazilərin ayrılması, yerli arı genefondunun mühafizəsi, arıçılıqda yeni texnologiyaların tətbiqi, arı ailələrinə zoobaytar qaydalarına uyğun qulluq edilməsi haqqında da arıçılara ətraflı məlumat verilib.

Tədbirdə Dövlət Baytarlıq Xidmətinin əməkdaşı Yavuz Hacıyev bal süzümündən sonra arıçılıqda baytarlıq tədbirlərinin aparılmasının əhəmiyyətindən, “Naxçıvan Muxtar Respublikası Arıçıları” İctimai Birliyinin sədri Etibar Məmmədov arıçılıqda yeni texnologiyaların tətbiqinin üstünlüklərindən danışıblar.

Sonda təsərrüfatçıları maraqlandıran suallar cavablandırılıb,mütəxəssislər tərəfindən hazırlanan maarifləndirici bukletlər iştirakçılara paylanıb.       

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti