Arıçılarla görüş keçirilib

Naxçıvan Muxtar Respublikası Kənd Təsərrüfatı Nazirliyinin, Dövlət Baytarlıq Xidmətinin və “Naxçıvan Muxtar Respublikası Arıçıları” İctimai Birliyinin əməkdaşları Babək Rayon İcra Hakimiyyəti ilə birgə Payız kəndində arıçılıqla məşğul olan sahibkarlarla görüş keçirib.

Tədbirdə bal süzümünün mütəşəkkil keçirilməsi və arılara zoobaytar qaydalara uyğun qulluq edilməsinin əhəmiyyəti məsələlərinə toxunulub.

Babək Rayon İcra Hakimiyyətinin nümayəndəsi Azər Hümbətov bildirib ki, rayonun əksər kəndlərinin torpaq-iqlim şəraiti arıçılığın inkişafı üçün çox əlverişlidir. Odur ki, ailə təsərrüfatçıları bu gəlirli sahəyə daha çox diqqət yetirirlər. Arıçılığın inkişafı məqsədilə arıçılara dövlət dəstəyi göstərilir və hər il sahibkarlara subsidiya ödənilir.

Kənd Təsərrüfatı Nazirliyinin şöbə müdiri Əyyub Abdullayev çıxış edərək “2017-2022-ci illərdə Naxçıvan Muxtar Respublikasında arıçılığın inkişafı üzrə Dövlət Proqramı”nın icrası ilə əlaqədar həyata keçirilən tədbirlərdən danışıb. O, hazırkı dövrdə arıçılıq sahəsində görüləcək işlər, bal süzümünün mütəşəkkil keçirilməsi və arı ailələrinə zoobaytar qaydalara uyğun qulluq edilməsinin əhəmiyyətini vurğulayıb.

Dövlət Baytarlıq Xidmətinin sektor müdiri Hüseyn Məmmədov çıxış edərək bal süzümündən sonra arıçılıqda baytarlıq tədbirlərinin aparılmasının əhəmiyyətindən danışıb.

Mütəxəssislər həmçinin görülməsi vacib olan zoobaytar tədbirləri də önə çəkiblər.

Tədbirdə “Naxçıvan Muxtar Respublikası Arıçıları” İctimai Birliyinin sədri Etibar Məmmədov qədim diyarda arıçılığın inkişafı üçün münbit şəraitin olduğunu diqqətə çatdırıb, xəstəliklərə və ziyanvericilərə qarşı mübarizə yollarından bəhs edib.

Qarşılıqlı fikir mübadiləsi şəraitində keçən görüşdə mütəxəssislər sahibkarları maraqlandıran sualları ətraflı cavablandırıb, onlara yaddaş kitabçaları paylayıblar.

 Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti