Hazırda muxtar respublikada 31 min 649 hektar sahənin taxılı biçilərək 102 min 742 ton məhsul toplanıb

Naxçıvan Muxtar Respublikası Kənd Təsərrüfatı Nazirliyində altıncı çağırış Naxçıvan Muxtar Respublikası Ali Məclisinin yeddinci sessiyasında qarşıya qoyulan vəzifələr və 2022-ci ilin 6 ayı ərzində görülən işlərlə bağlı iclas keçirilib. İclasda kənd təsərrüfatı naziri Bəhruz Bayramov bildirib ki, altıncı çağırış Naxçıvan Muxtar Respublikası Ali Məclisinin yeddinci sessiyasında Kənd Təsərrüfatı Nazirliyi qarşısına qoyulan tapşırıqlara əsasən əkin strukturuna daxil olan torpaqların əkilməsi diqqətdə saxlanılmalı, bununla bağlı müvafiq tədbirlər görülməli, eyni zamanda dəmyə torpaqlarda taxıl əkini təşviq olunmalıdır.

Nazir qeyd edib ki, qəbul edilmiş dövlət proqramlarında nəzərdə tutulmuş tədbirlərin icrası sayəsində muxtar respublikada ərzaq təhlükəsizliyi təmin olunub. Hazırda Babək rayonunun Nehrəm qəsəbəsi ərazisində 250, Çeşməbasar, Güznüt kəndləri ərazisində isə 240 hektar sahədə qapalı suvarma və kollektor drenaj şəbəkəsinin tikintisi davam etdirilir. Həmçinin Kəngərli rayonunun Böyükdüz və Xok kəndlərinin 3200 hektar əkin sahələrini suvarma suyu ilə təmin etmək üçün Araz Su Anbarından qidalanan yeni nasos stansiyasının və təzyiqli boru xəttinin tikintisinə başlanılıb.

Vurğulanıb ki, “Naxçıvan Aqrolizinq” Açıq Səhmdar Cəmiyyətinin xətti ilə 93-ü 2022-ci ilin ötən dövründə olmaqla, cəmi 3495 ədəd müxtəlif təyinatlı kənd təsərrüfatı texnikası və texnoloji avadanlıq muxtar respublikaya gətirilib, ondan 2652 ədədi lizinq yolu ilə məhsul istehsalçılarına verilib, 315 ədədi isə nağd və ya köçürmə yolu ilə satılıb.

Bəhruz Bayramov cari ilin məhsulu üçün ötən ilin payızında və bu ilin yazında muxtar respublikada 33 min 466 hektar sahədə taxıl əkininin aparıldığını vurğulayıb. Qeyd edib ki, hazırda muxtar respublikada 31 min 649 hektar sahənin taxılı biçilərək 102 min 742 ton məhsul toplanıb. 2022-ci ilin ötən altı ayında muxtar respublikada 24 min 244 hektar sahədə isə yazlıq əkin keçirilib. Kənd təsərrüfatının inkişafı ilə bağlı banklar və kredit təşkilatları tərəfindən 8 milyon 861 min manat kredit verilib.

Qeyd edilib ki, hazırda muxtar respublikada 12 toxumçuluq və 11 tinglik təsərrüfatı fəaliyyət göstərir. Muxtar respublikaya dərman preparatları gətirilib, pulsuz olaraq yerli icra hakimiyyəti və bələdiyyələr vasitəsilə sahibkarlara çatdırılıb. Taxıl sahələrində alaq otlarına qarşı 7150 hektardan artıq sahədə kimyəvi mübarizə işləri təşkil edilib. Torpaqların münbitliyini artırmaq məqsədilə 2022-ci ilin əvvəlində rayonlar üzrə gübrə tələbatı müəyyən edilib. Ötən dövrdə Toxumçuluq və bitkilərin mühafizəsi idarəsinin laboratoriyasında  150 ton kartof, 56 ton arpa, 3,6 ton müxtəlif ot, 71 ton qarğıdalı, 1 ton günəbaxan, 175 kq  tərəvəz, 145 kq bostan, 2,5 ton paxlalı toxum nümunələri götürülərək analiz olunub, torpaq   mülkiyyətçilərinə   nəticə  aktı  təqdim edilib.

Qeyd olunub ki, süni mayalama məntəqələri Süni Mayalanma Mərkəzində istehsal olunan toxumlarla təmin edilməklə yanaşı, mərkəzdə toxum bankı yaradılıb, 1 iyul 2022-ci il tarixə 39 min 370 min dozadan artıq toxum ehtiyatı var. Bunun nəticəsidir ki, 2002-2022-ci ilin  iyul ayının 1-dək 113 min 426 baş ana mal süni yolla mayalandırılıb və bundan 82 min 389 baş cins bala alınıb. Əvvəlki ilin müvafiq dövrü ilə müqayisədə  896,9 ton çox ət, 769,4 ton çox süd, 10,1 ton yun və 1467,4 min ədəd çox yumurta istehsal olunub. Hazırda muxtar respublikada 106 min arı ailəsi mövcuddur. Cari ilin birinci rübündə arıçılıqla məşğul olmaq istəyən sahibkarlara güzəştli şərtlərlə 20 min 500 manat həcmində kreditlər verilib. Cari ildə muxtar respublika  üzrə 24 min 244 hektar sahədə yazlıq bitkilər əkilib. Görülmüş  işlərin  nəticəsidir ki, 2022-ci ilin ötən dövründə kənd təsərrüfatının ümumi məhsulu 152 milyon 756 min manat təşkil edib ki, bu da əvvəlki ilin müvafiq dövrü ilə müqayisədə 3,7 faiz çoxdur.

Bəhruz Bayramov qarşıda duran vəzifələri diqqətə çatdıraraq, aidiyyəti üzrə tapşırıqlar verib. Qeyd olunub ki, əkin dövriyyəsindən kənarda qalan torpaqlar əkilib-becərilməli, taxıl sahəsində idxaldan asılılıq aradan qaldırılmalıdır. Elə  iyulun 7-də “Araz” Elm-İstehsalat Birliyinin təcrübə təsərrüfatında Naxçıvan Muxtar Respublikasında taxılçılığın inkişafı və qarşıda duran vəzifələrlə bağlı keçirilən müşavirədə və 16 iyul 2022-ci il tarixdə keçirilmiş sessiyada qarşıya qoyulan tapşırıqlar da bunları tələb edir. Verilən tapşırığa əsasən muxtar respublikanın toxuma olan illik tələbatını müəyyənləşdirməli, “Araz” Elm-İstehsalat Birliyinin yardımçı təcrübə təsərrüfatlarında və Naxçıvan Toxumçuluq Mərkəzində məhsuldar toxum sortları yetişdirilməli, torpaq mülkiyyətçiləri sertifikatlaşdırılmış toxumlarla təmin olunmalıdır. 

Sonra məruzə ətrafında çıxışlar dinlənilib, qərar layihəsi oxunub, nazirliyin Tədbirlər Planı təsdiq edilib.