Naxçıvan Muxtar Respublikası Kənd Təsərrüfatı, Ekologiya və Təbii Sərvətlər nazirliklərinin və Dövlət Baytarlıq Xidmətinin əməkdaşları Şahbuz Rayon İcra Hakimiyyəti ilə birlikdə “Batabat” yaylağında heyvandarlıqla məşğul olan təsərrüfat sahibləri ilə görüş keçirib.

Tədbirdə yaylaqlardan səmərəli istifadə edilməsi, baytarlıq tədbirlərinin vaxtında aparılması və yovşan bitkisinin müalicəvi əhəmiyyəti məsələlərinə toxunulub.

Şahbuz Rayon İcra Hakimiyyətinin nümayəndəsi Məhəmməd Bayramov bildirib ki, rayonun əksər kəndlərinin torpaq-iqlim şəraiti heyvandarlığın inkişafı üçün çox əlverişlidir. Odur ki, ailə təsərrüfatçıları bu gəlirli sahəyə daha çox diqqət yetirirlər.

Kənd Təsərrüfatı Nazirliyinin şöbə müdiri Əyyub Abdullayev qeyd edib ki, yaylaq şəraitində heyvanların düzgün yemləndirilməsi daimi olaraq fermerlərin diqqət mərkəzində olmalıdır. Bundan əlavə yaylaq şəraitinin ot örtüyü və su təminatı nəzərdən keçirilməli, heyvanlar otlağa buraxmazdan əvvəl hökmən baytarlıq müayinəsindən keçirilməli, dırnaqları kəsilib təmizlənməli, buynuzlarının iti ucları mişarlanıb hamarlanmalıdır. Yaylaqlarda heyvanlar sistemli otarılmalıdır, əks halda keyfiyyətli bitkilərin və otlağın məhsuldarlığı azalır ki, bu da heyvanların qida maddələrinə olan tələbatını ödəmir. Yaylaqda  heyvanların yerlərini tez-tez dəyişdirməklə otlaqların yaxşılaşmasına nail olmaq olar. Belə ki, bu tədbir torpaq sahəsini peyinlə münbitləşdirir ki, nəticədə örüş sahəsinin ot məhsuldarlığı artır. Otlaq şəraitində heyvanları yalnız yaşıl otla yemləmək olmaz. Odur ki, heyvanlara əlavə olaraq qüvvəli yemlər də verilməlidir. Bu məqsədlə onlara qarışıq yem, arpa yarması, çiyid cecəsi və.s verilməsi məsləhətdir. Qüvvəli yemlərin gündəlik normasının yarısı səhər və yarısı isə axşam sağımından sonra verilməlidir.

Mütəxəssis həmçinin vurğulayıb ki, muxtar respublikada yovşan bitkisinin böyük ehtiyatı vardır. Bu bitki qış otlaqlarının əsas fitosenozunu təşkil edir və qış aylarında heyvanlar tərəfindən həvəslə yeyilir. Yovşan heyvanların qurdlardan azad olmasını və proteinə olan tələbatını təmin edir. Muxtar respublikanın yay və qış otlaqları ərazisində yem və dərman bitkisi kimi perspektiv əhəmiyyət kəsb edən acı yovşan geniş yayılmışdır. Sahibkarlar bu bitkini tədarük edib, dəmləməsini yaylaqda qoyunlara içirməklə heyvanları mədə-bağırsaq qurdlarından azad etmiş olarlar.