Balıqçılığın inkişafı ilə bağlı maarifləndirici müşavirə keçirilib

Naxçıvan Muxtar Respublikası Kənd Təsərrüfatı Nazirliyinin mütəxəssisləri Kəngərli Rayon İcra Hakimiyyəti ilə birlikdə Qarabağlar kəndində balıqçılıqla məşğul olan təsərrüfat sahiblərinin iştirakı ilə “Balıqların düzgün yemləndirilməsi və balıq xəstəliklərinə qarşı baytarlıq tədbirlərinin vaxtında aparılmasının əhəmiyyəti” mövzusunda müşavirə keçiriblər.

Müşavirədə nazirliyin aparıcı məsləhətçisi Umar Şükürlü balıqçılığın inkişafı ilə bağlı danışaraq qeyd edib ki, muxtar respublikada balıq ehtiyatlarının artırılması və əhalinin balıq məhsullarına olan təlabatın ödənilməsi istiqamətində bir sıra işlər görülür. Görülən işlərin əsası da süni balıq yetişdirilməsidir. Süni balıq yetişdirilməsində isə əsasən forel balığının yetişdirilməsinə üstünlük verilir. Forel balıqları soyuq, təmiz, bol oksigenli axar suyu olan mənbələrdə yaşayır. Cinsi yetkənliyə 2-3 yaşlarında çatır. Çoxalma vaxtı dekabr-fevral ayları arasındadır. Əlvan forel, adaptasiyasının yüksək olması, süni üsulla kürü alınmasının rahatlığı və süni yemlərə tez öyrənməsi, xəstəliklərə qarşı dayanıqlı olması kimi xüsusiyyətlərinə görə yetişdirilir. Yetişdirilən forellərin iqtisadi səmərəsi onların düzgün yemləndirilməsindən asılıdır. Yemlər balıqların fizioloji vəziyyəti, suyun temperaturu və suda olan oksigenin miqdarı, yemin tərkibi və ölçüsündən asılı olaraq dozalaşdırılır. Yemlərin həddən çox verilməsi yem xərclərinə və suyun çirklənməsinə, kifayət etməyən dərəcədə yemləmə isə, balıqların boy artımı potensialından tam istifadə olunmamasına səbəb olur. Forelləri elə yemləndirmək lazımdır ki, onlar yem paylanandan sonra bütün yemi uda bilsinlər. Yemi elə  tökmək lazımdır ki, bütün balıqlar ondan istifadə edə bilsinlər. Hər hovuz üçün gündəlik yem norması düzgün təyin edilmədikdə yemləmənin səmərəliliyi aşağı düşür. Bundan başqa yemləmənin səmərəliliyinə balıqların salınma sıxlığı, antisanitar şərait, bir hovuzda müxtəlif keyfiyyətli balıqların olması, xəstəliklər, aşağı səviyyədə su mübadiləsi, suda aşağı səviyyədə oksigenin olması və.s təsir göstərir. Forellərin yetişdirilməsində yemə sərf olunan xərclər bütün xərclərin 60%-ni təşkil edir, yemlərdən səmərəli istifadə və onlara qənaət əsas problem kimi ortaya çıxır. Balıqları əsasən tez-tez balaca porsiyalar ilə yemləndirmək lazımdır. Balıq nə qədər balacadırsa, o qədər də tez-tez yemləndirmək lazım gəlir. Aşağı tempeaturda yemləmənin  tezliyi gündə bir dəfədən, həftədə bir dəfəyədək ola bilər. Forel körpələri 15-16⁰C temperaturda, keyfiyyətli və yetərli yemlə 90 gündə 20 qrama çata bilir. Ancaq aşağı temperaturda bu müddət uzanır, belə vəziyyətdə 150 gündə ən azından 10 qram canlı kütləyə çatdırılır. Körpə balıq yetişdirilməsində məqsəd 20 qramdan artıq çəki əldə etməkdir.

Həmçinin vurğulanıb ki, balıq yetişdirilən hovuzların müəyyən vaхt keçdikdən sonra döşəməsi və yan divarları yosunlaşır. Çirklənmiş hovuzlardakı tullantılar içərisindəki bakteriyalar oksigeni mənimsəyib suyun oksigen miqdarını azaldır və suda azotlu birləşmələrin miqdarını artırır. Bu səbəbdən də hovuzlar mütəmadi təmizlənməli və dezinfeksiya edilməlidir. Bundan başqa parazitar xəstəliklər balıq əmtəə təsərrüfatına ciddi zərər vurur. Belə ki, xəstəlik törədicilərinə yoluxan balıqlar inkişafdan qalır, ətinin keyfiyyəti aşağı düşür, həmçinin bəzi hallarda kütləvi qırılır. Bu baxımdan sahibkarların yaratdıqları balıqçılıq təsərrüfatlarında parazitoloji vəziyyəti müəyyən etməsi, xəstəliklərin törənmə səbəblərini bilməsi və vaxtında səmərəli mübarizə tədbirlərini həyata keçirməsi olduqca vacibdir.

Sonda təsərrüfat sahiblərini maraqlandıran suallar cavablandırılıb və mütəxəssislər tərəfindən hazırlanan bukletlər tədbir iştirakçılarına paylanıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti