Maarifləndirici görüş keçirilib

Naxçıvan Muxtar Respublikası Kənd Təsərrüfatı Nazirliyinin, Daşınmaz Əmlak və Torpaq Məsələləri üzrə Dövlət Xidmətinin, Antiintisar və İstehlak Bazarına Nəzarət Dövlət Xidmətinin əməkdaşları tərəfindən Kəngərli Rayon İcra Hakimiyyətinin nümayəndələri ilə birlikdə Böyükdüz kəndində ailə təsərrüfatı başçıları, aqrar sahədə fəaliyyət göstərən hüquqi və fiziki şəxslərin iştirakı ilə “Naxçıvan Muxtar Respublikasında aqrar sahənin inkişafı ilə bağlı qəbul olunmuş Dövlət proqramlarının əhəmiyyəti və yaz əkinlərinə  aqrotexniki qaydalara uyğun qulluq edilməsi” mövzusunda maarifləndirici görüş keçirilib. 

Tədbiri Kəngərli Rayon İcra Hakimiyyətinin nümayəndəsi Ağa Seyidov açaraq bildirib ki, muxtar respublikada kənd təsərrüfatının inkişaf etdirilməsinə dair qəbul edilən qərarlar, reallaşan Dövlət proqramları kənd təsərrüfatı məhsullarının sənaye sahəsinə yönəldilməsinə və ixracına şərait yaratmışdır. Bu da əhalinin iqtisadi gəlirlərinin artmasına səbəb olmuşdur. 2021-ci ildə aqrar sahədə həyata keçirilən tədbirlər Kəngərli rayonu üçün də uğurlu olmuşdur.

Naxçıvan Muxtar Respublikası Kənd Təsərrüfatı nazirliyinin şöbə müdiri Xaliq Abbasov qəbul olunmuş Dövlət proqramlarının əhəmiyyətindən, əkinlərin əkin atlaslarına uyğun aparılmasından, əkin zamanı məhsuldar sortların əkilib-becərilmə texnologiyasından, əkinlərə gübrə normasının düzgün və vaxtında verilməsinin əhəmiyyətindən, yağ üçün qarğıdalı və günəbaxan bitkisinin əkilib-becərilməsindən, taxıl sahələrində alaq otlarına qarşı kimyəvi mübarizənin aparılmasından danışıb.

Daşınmaz Əmlak və Torpaq Məsələləri üzrə Dövlət Xidmətinin sektor müdiri Oktay Məmmədov torpaqlardan səmərəli istifadə etməklə torpaqların münbitliyini qoruyub saxlanılmasından, Antiintisar və İstehlak Bazarına Nəzarət Dövlət Xidmətinin əməkdaşı Əli Şərifov ailə təsərrüfatlarına göstərilən Dövlət dəstəyindən və qida təhlükəsizliyi sahəsində aparılan işlərdən  danışıblar.

Sonda təsərrüfat sahiblərini maraqlandıran suallar mütəxəssislər tərəfindən cavablandırılıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti