Ordubad rayonunda təsərrüfat sahibləri ilə görüşlər keçirilib

Naxçıvan Muxtar Respublikası Kənd Təsərrüfatı Nazirliyinin,  Dövlət Sığorta Xidməti Publik Hüquqi Şəxsinin,  Dövlət Baytarlıq Xidmətinin və “Naxçıvan Muxtar Respublikası Arıçıları” İctimai Birliyinin mütəxəssisləri Ordubad Rayon İcra Hakimiyyətinin əməkdaşları ilə birlikdə rayonun Azadkənd, Aza və Sabirkənd kəndlərində arıçılıq, heyvandarlıq və bitkiçiliklə məşğul olan təsərrüfat sahibləri ilə görüşlər keçiriblər.

Aza kəndində arıçılarla keçirilən görüşdə Kənd Təsərrüfatı Nazirliyinin şöbə müdiri Əyyub Abdullayev yaz aylarında arı ailələrinə zoobaytar qaydalarına uyğun qulluq edilməsi mövzusunda çıxış edərək qeyd edib ki, yazın ilk günlərində arıçıların arı yeşikləri üzərindəki görəcəyi işlər, həmin il üçün məhsuldarlığı müəyyən edir. Təcrübəli arıçılar yaz mövsümünə laqeyd yanaşmamalı, arıxanadakı problemləri bu başdan müəyyən etməli və bal toplama mövsümünə arıları məhsuldar şəkildə çıxartmalıdır.  Çıxışda vurğulanıb ki, soyuq havalarda pətəyin qapağının açılması arılarda panika yaradır və çox aqresiv olurlar. Buna görə də, havalar istiləşənə qədər pətəyi xaricdən müayinə edərək və arıların hərəkətlərinə baxaraq, problemləri müəyyən etmək lazımdır. Bir arı ailəsinin həyatda qalması üçün ana arının olması şərtdir. Həmin günlərdə arılar sürətli  şəkildə çalışıb yeşiyə çiçək tozu (polen) gətirirlərsə, bu ana arının varlığına işarədir. Əgər arılar polen gətirmirlərsə və pətəkdən qıraqda gəzirlərsə, ana arı böyük ehtimalla qışda ölmüşdür. İşçi arılar pətəyə bir-bir, iki-iki girib çıxırlarsa arı ailəsi zəif sayılır. Amma, işçi arıların toplum halında pətəyə girib çıxması, pətəyin güclü olduğunu göstərir.

Azadkənd kəndində heyvandarlıqla məşğul olan təsərrüfat sahibləri ilə keçirilən görüşdə Əyyub Abdullayev mal-qaranın cins tərkibinin yaxşılaşdırılmasında süni mayalanma tədbirlərinin aparılmasının əhəmiyyətindən danışaraq bildirib ki, son illərdə muxtar respublikamızda heyvanların cins tərkibinin yaxşılaşdırılması, iri heyvandarlıq təsərrüfatlarının yaradılması və xarici ölkələrdən lizinq yolu ilə güzəştli şərtlərlə damazlıq düyələrin idxal edilməsi nəticəsində bu düyələrin təkrar istehsalında süni mayalandırma işinə daha çox tələbat yarandığından kənd yerlərində bu sahəyə maraq artıb. Ötən il muxtar respublikada Süni Mayalama Mərkəzinin  yaradılması, bütün rayonlarda və Naxçıvan şəhərində yeni süni mayalama məntəqələrinin sayının 23-ə çatdırılması bu işlərin daha da mütəşəkkil şəkildə aparılmasına öz tövhəsini verəcək.

Sabirkənd kəndində torpaq mülkiyyətçiləri ilə keçirilən görüşdə Kənd Təsərrüfatı Nazirliyinin baş məsləhətçisi Fəxrəddin Əliyev bitkiçilkdə aqrar sığortanın əhəmiyyəti mövzusunda çıxış edərək bildirib ki, mülkiyyət formasından asılı olmayaraq dövlət aktı olan kənd təsərrüfatı bitkilərinin istehsalçılarına məxsus kənd təsərrüfatı bitkiləri sığortanın obyekti sayılır. Bu növ könüllü sığorta üzrə sığorta məbləği kənd təsərrüfatı bitkilərinin məhsullarının son 5 ildə və ya ondan az müddətdə 1 hektarın orta məhsuldarlığına, bazar qiymətinə və əkin sahəsinə görə müəyyən edilir. Bu sığorta növündə sığorta riskləri  yanğın, dolu, sel, daşqın, şaxta  hesab olunur.  Yuxarıda göstərilən sığorta hadisələri nəticəsində kənd təsərrüfatı bitkilərinin məhsullarının zədələnməsi və məhv olması ilə əlaqədar kənd təsərrüfatı məhsulları istehsalçılarına dəyən zərərlərə sığorta təminatı verilir. Kənd təsərrüfatı bitkiləri və çoxillik əkmələrin məhsulunun dəyəri 70% miqdarında sığorta olunur.

Müşavirələrdə Dövlət Sığorta Xidməti Publik Hüquqi Şəxsinin, Dövlət Baytarlıq Xidmətinin və “Naxçıvan Muxtar Respublikası Arıçıları” İctimai Birliyinin mütəxəssisləri çıxış edərək heyvandarlıqda sığortanın əhəmiyyətindən, heyvandarlıqda aparılacaq baytarlıq tədbirlərindən və arıçılıqda yeni texnologiyaların tətbiqinin əhəmiyyətindən bəhs ediblər.

Sonda  iştirakçıları maraqlandıran suallar ətraflı  cavablandırılıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti