Ordubad rayonunda seminar-müşavirə keçirilib

Naxçıvan Muxtar Respublikası Süni Mayalanma Mərkəzinin əməkdaşları tərəfindən Ordubad Rayon İcra Hakimiyyəti ilə birlikdə rayonun Vənənd kəndində heyvandarlıq təsərrüfatı sahiblərinin iştirakı ilə “Damazlıq məqsədi üçün seçilmiş malların düzgün yemləndirilməsi” mövzusunda seminar-müşavirə keçirilib.

Müşavirəni Ordubad Rayon İcra Hakimiyyətinin əməkdaşı Mübariz Hüseynov açaraq müşavirənin əhəmiyyətindən və heyvandarlığın inkişafına göstərilən dövlət dəstəyindən danışıb.

Naxçıvan Muxtar Respublikası Süni Mayalanma Mərkəzinin direktoru Yusif Qurbanov damazlıq məqsədi üçün  seçilmiş malların düzgün  yemləndirilməsi mövzusunda danışaraq bildirib ki,  heyvandarlığın inkişafında əsas məqsədlərdən biri  yerli malların cins tərkibini yaxşılaşdırmaq üçün süni mayalanmadan alınan dişi buzovların gələcəkdə damazlıq olaraq istifadə olunmasıdır. Damazlıq üçün seçilən buzovların  intensiv yetişdirmə şəraitinin yaradılması təşkil olunmalıdır. Damazlıq üçün nəzərdə tutulan dişi buzovların fizioloji yetişkənliyə çatana qədər xəstəliklərə qarşı müqavimətinin artırılması,  sağlamlığının  möhkəmləndirilməsi üçün  yemləmə və saxlama şəraiti zoogigiyenik qaydalara cavab verməlidir. Damazlıq üçün seçilən dişi buzov təsərrüfatda mövcud olan ana malların ən yüksək məhuldarlıq göstəricisi olanlarından götürülməlidir. Yeni doğulmuş buzovlar ilk gündən protein və vitaminlərə ehtiyac duyurlar. Bu ehtiyacın təmin olunmasında ağuz südü əvəzolunmaz qida mənbəyidir. Ağuz südünün tərkibinin qida maddələri ilə zəngindir. Ağuz südünün tərkibində adi süddən fərqli olaraq çoxlu miqdarda  qloblin  var ki, o da buzovun orqanizmində  antitoksinlərin  miqdarının  artmasına səbəb olur. Buzovların gündə  üç dəfə  ağuz südü  ilə qidalanması  normal sayılır. Ağuz südü 5-7 gündən sonra öz spesifikliyini  itirmiş olub adi südə çevrilir. Südəmər dövrünün 7-10 günlüyündə buzovların tədricən  ot-saman yemlərinə öyrədilməyə başlanılması  məsləhət görülür. Buzovların bitki yemlərə erkən öyrənilməsi gələcəkdə həzmi stimullaşdırır, xəstələnmələri azaldır və orqanizmin müqavimətini artırır. İlk aylarda buzovların mədə önlərinin inkişaf etməməsi səbəbindən buzovlar böyük miqdarda bitki yemindən istifadə edə bilmir. Bu proses tədricən  həyata  keçirilməlidir. Buzovlar iki aylığına keçəndə ümumi yemləmənin 50 faizini bitki yemi təşkil etməlidir.

Dişi danalar 3-4 aylıq olanda bitki mənşəli, yüksək keyfiyyətli yemlərlə  yemləndiriləndə yaxşı inkişaf edir. Altı aya qədər buzovlar 180-350 kiloqram süd istehlak etmiş olur. Tələb olunan qaydalara uyğun formada yemləmə və bəsləmə  şəraiti yaradılarsa, damzlıq düyələrin 17-18 aylarında diri çəkisi 300-350 kiloqram olmaqla ilkin mayalandırmaq üçün yararlı sayıla bilər.

Mərkəzin əməkdaşları Məmməd Məmmədov və Vüsalə Qafarova süni mayalanmadan sağlam balaların alınması haqqında iştirakçılara ətraflı məlumat veriblər.

Sonda iştirakçıları maraqlandıran suallar mütəxəssislər tərəfindən ətraflı cavablandırılıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti