Şərur rayonunda seminar-müşavirə keçirilib

Naxçıvan Muxtar Respublikası Kənd Təsərrüfatı Nazirliyinin mütəxəssisləri Şərur Rayon İcra Hakimiyyəti ilə birlikdə rayonun Xanlıqlar kəndində heyvandarlıqla məşğul olan təsərrüfat sahiblərinin iştirakı ilə “Mal-qaranın cins tərkibinin yaxşılaşdırılması, zoobaytar qaydalarına uyğun yemləndirilməsi və heyvandarlıqda aqrar sığortanın tətbiqinin əhəmiyyəti” mövzusunda seminar-müşavirə keçiriblər.

Müşavirəni Şərur Rayon İcra Hakimiyyyətinin əməkdaşı Yasin Seyidov açaraq rayonda heyvandarlığın inkişafından və bu sahəyə göstərilən dövlət dəstəyindən danışıb.

Kənd Təsərrüfatı Nazirliyinin şöbə müdiri Əyyub Abdullayev qaramalın cins tərkibinin yaxşılaşdırılması, süd və süd məhsullarının istehsalının artırılması, mal-qaranın zoobaytar qaydalarına uyğun yemləndirilməsi mövzularında çıxış edərək bildirib ki, süni mayalama tədbirləri muxtar respublikada heyvandarlığın daha da inkişaf etdirilməsinə, mal-qaranın cins tərkibinin yaxşılaşdırılmasına, heyvandarlıq məhsullarının intensiv artımına və təhlükəli xəstəliklərin yayılmasının qarşısının alınmasına ciddi təsir göstərməyə başlamışdır. Heyvandarlıqda süni mayalama tədbirlərinin genişləndirilməsi nəticəsində alınan mələz balaların hesabına mal-qaranın cins tərkibi ildən-ilə yaxşılaşır. Eyni zamanda naxırda cins heyvanların baş sayının artması ilə yanaşı heyvandarlıq məhsulları istehsalının artmasına da ciddi təsir göstərir, əhalinin süd və süd məhsullarına olan təlabatının yerli istehsal hesabına ödənilməsinə öz töhfəsini verir. Həmçinin vurğulanıb ki, təsərrüfat sahibləri heyvanların yemləndirilməsi zamanı qaba yemlərlə yanaşı norma nisbətində sulu-şirəli və qüvəlli yemləri də heyvanların yem payına qatmaqla öz təsərrüfatlarındakı heyvanların məhsuldarlığını artırmış olarlar.

Nazirliyin baş məsləhətçisi Rasim Hacıyev otlaqlardan səmərəli istifadə edilməsindən danışaraq bildirib ki, muxtar respublikada heyvandarlığı daha mütərəqqi üsullarla inkişaf etdirmək, məhsuldarlığı yüksəltmək, yay-qış otlaqlarının və biçənəklərin mühafizəsini gücləndirmək, onlardan istifadənin səmərəsini artırmaq və biomüxtəlifliyin qorunub saxlanılmasını təmin etmək məqsədilə sahibkarlar tərəfindən zəruri tədbirlərin həyata keçirilməsi vacibdir. Havaların qeyri sabit keçməsi yay otlaq sahələrində yem ehtiyatlarının qorunması və bərpası tədbirlərinin önəmini daha da artırır.

Nazirliyin aparıcı məsləhətçisi Umar Şükürlü aqrar sığortanın tətbiqinin əhəmiyyətindən danışaraq qeyd edib ki, kənd təsərrüfatı məqsədilə yetişdirilən heyvanlar və akvakultura məhsulu üzrə sığorta haqqının 50 faizi dövlət büdcəsi hesabına ödəniləcək. Heyvandarlıq sahəsində məhsuldarlıq və istehsal göstəricilərinin yüksəldilməsi məqsədilə 11-ci gündən 7 yaşına qədər südlük inək və camışlar, 11-ci gündən 3 yaşına qədər ətlik istiqamətli danalar-kəlçələr və 11-ci gündən 5 yaşına qədər xırdabuynuzlu heyvanlar, qoyun və keçilər, suda yetişdirilən məhsullar üzrə akvakulturanın inkişafını stimullaşdırmaq, balıq məhsulları ilə təminatda yerli istehsalın xüsusi çəkisini artırmaq məqsədilə ilkin mərhələdə balıqların sığortası təmin ediləcəkdir.

Sonda müşavirə iştirakçılarını maraqlandıran suallar cavablandırılıb, mütəxəssislər tərəfindən hazırlanan bukletlər təsərrüfat sahiblərinə paylanıb.

Naxçıvan  Muxtar Respublikası 
Kənd Təsərrüfatı Nazirliyinin mətbuat xidməti